В.Путин Константиновка хотод түр гал зогсоох санал тавьсныг Украин эсэргүүцэв
ОХУ-ын Ерөнхийлөгч Владимир Путин АНУ-ын тусгай төлөөлөгч нартай Москва хотноо хэлэлцээ хийх үеэрээ Донецк мужийн фронтын шугам дээр орших Константиновка хотод тав хоногийн хугацаатай гал түр зогсоох санал дэвшүүллээ. Тэрбээр уг хугацаанд тус бүсэд гацсан энгийн иргэдийг нүүлгэн шилжүүлэх болон мина цэвэрлэх хүмүүнлэгийн ажиллагаа хамтран явуулахыг уриалсан ч Украины тал үүнийг байлдааны бэлтгэл хангах далд оролдлого хэмээн үзэж эсэргүүцсэн байна.
Кремльд болсон уг уулзалтын өмнө Арабын Нэгдсэн Эмират Улсын Абу Даби хотноо АНУ-ын зуучлалаар гурван талт хэлэлцээ хоёр өдөр үргэлжилсэн юм. В.Путины мэдэгдсэнээр Константиновка хотод 400-500 орчим энгийн иргэн үлдсэн бөгөөд тэднийг аюулгүй гаргахын тулд тэсрэх бөмбөг, мина цэвэрлэх таван хоногийн завсарлага зайлшгүй шаардлагатай гэж үзжээ.
Харин Украины Ерөнхийлөгчийн зөвлөх уг саналыг эрс няцааж, Москвагийн эрх баригчид хүмүүнлэгийн нэрийдлээр фронтын шугамаа бэхжүүлэх зорилго агуулж байна хэмээн анхааруулав. Украины тал аравдугаар сарын 27-ноос арваннэгдүгээр сарын 1-ний хооронд Олешки хотод зарласан түр эвлэрлийг Оросын цэргүүд урвуулан ашиглаж, шинэ бие бүрэлдэхүүн сэлгэх, хүнд зэвсэг болон сум хэрэгсэл татан байрлуулах замаар байр сууриа бэхжүүлсэн явдлыг дурджээ. Түүнчлэн Украины Зэвсэгт хүчний Ерөнхий штаб Константиновка хотыг Оросын тал хянаж байгаа гэх мэдэгдлийг няцааж, Украины цэргүүд байрлалаа хадгалан дайсны нэвтрэх оролдлогыг таслан зогсоосоор байгаа тул хяналтгүй завсарлага нь тактикийн асар өндөр эрсдэл авчирна гэж мэдэгдлээ.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.