ОХУ-ын Красноярск хязгаараас 125 сая жилийн настай үлэг гүрвэлийн олдвор илрүүлжээ
Оросын Красноярск хязгаарын Козульский дүүрэгт явуулсан палеонтологийн малтлагын үеэр эртний Цэрдийн галавын эхэн үед буюу ойролцоогоор 125 сая жилийн өмнө амьдарч байсан жижиг биетэй, махчин үлэг гүрвэлийн чулуужсан араг ясны хэсгүүдийг олж илрүүлсэн байна.
Уг судалгааны ажлыг Төв Сибирийн геологийн музейн палеонтологич Яков Колесниковоор ахлуулсан баг «Полюс» алт үйлдвэрлэлийн компанийн дэмжлэгтэйгээр зохион байгуулжээ. Эрдэмтэд малтлагын явцад махчин гүрвэлийн аарцаг, хойд хөл буюу тавхайн яс, сүүлний нугалам болон шүдний үлдэгдлийг газрын гүнээс гарган авсан байна. Түүнчлэн тухайн хөрсний давхаргаас эртний жижиг матар хэлбэртнүүд, гүрвэлүүд болон эртний хөхтөн амьтдын байж болзошгүй ясны хэлтэрхийнүүд давхар олдсон нь тухайн үеийн биологийн орчныг судлах боломжийг бүрдүүлж байна.
Урьдчилсан шинжилгээгээр тус амьтан өндрөөрөө нэг метрээс хэтрэхгүй, хойд хоёр хөл дээрээ шаламгай гүйдэг, жижиг хэмжээний ангууч байсныг судлаачид тогтоожээ. Уг махчин нь бусад том гүрвэлүүдийн үр төл, сүүлгүй хоёр нутагтан болох саламандра, жижиг гүрвэл болон эртний хөхтөн амьтдаар хооллодог байсан аж.
Одоогоос 125 сая жилийн өмнө Сибирийн бүс нутаг чийглэг, шилмүүст ой модоор хучигдсан байсан бөгөөд энэхүү ангууч нь сүүлчийн стегозаврууд, эвэрт пситтакозавр болон хүзүүт аварга титанозавр хэлбэртнүүдтэй зэрэгцэн амьдарч байжээ.
Одоогийн байдлаар мэргэжилтнүүд илрүүлсэн яснууд нэг бодгальд хамаарах эсэхийг нарийвчлан тодорхойлохоор ажиллаж байна. Мөн өмнө нь Кемерово мужаас олдож байсан киякурсор зэрэг төстэй олдворуудтай харьцуулан, генеалогийн холбоог нь судлах юм. Хамгийн гол зорилго нь олдворын хадгалагдсан анатомийн шинжүүд шинжлэх ухаанд шинэ бие даасан төрөл зүйл гэж зарлахад хүрэлцэхүйц эсэхийг батлахад чиглэж байна.
Энэхүү олдвор нь Сибирийн бүс нутаг дахь эртний Цэрдийн галавын экосистем болон үлэг гүрвэлүүдийн хувьслыг ойлгоход чухал ач холбогдолтой юм. Судалгааны явцад олдсон ясны зарим хэсгийг Төв Сибирийн геологийн музейн танхимд байршуулан үзэгчдэд сонирхуулж эхэлжээ.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.