Хятадад Мбаппег зурагтаар гаргах, зургийг нь рекламанд ашиглахыг хориглов
Францын шигшээ баг болон "Реал Мадрид" клубийн довтлогч Килиан Мбаппе БНХАУ-ын удирдагч асан Мао Зэдуныг "Хятадын дарангуйлагч" хэмээн нэрлэсэн нь тус улсад хүчтэй эсэргүүцэл дагуулж, томоохон хамтын ажиллагаанууд цуцлагдахад хүрлээ.
Багийн анд Орельен Тчуаменигийн хөтлөн явуулдаг "The Bridge" нэвтрүүлэгт оролцох үеэрээ өөрийнх нь зурагтай хошин зургийг тайлбарлахдаа ийм үг хэлсэн нь сурталчилгааны гэрээ цуцлагдах, Испанийн хөлбөмбөгийн лигийн тоглолтын дамжуулалт түр зогсох зэрэг өргөн хүрээний үр дагаврыг араасаа дагуулаад байна.
Цахим сүлжээнд хөлбөмбөг сонирхогчид Мбаппег баг дотроо бүх эрх мэдлийг гартаа авч, "дарангуйлагч" шиг авирладаг хэмээн хошигнож, түүний нүүр царайг түүхэн удирдагчдын зураг дээр эвлүүлэн тавих явдал өмнө нь цөөнгүй гарч байжээ. Нэвтрүүлгийн явцад өөрт нь хамгийн их таалагдсан хошин зургийн талаар асуухад тэрбээр Мао Зэдуны бие дээр өөрийнх нь царайг эвлүүлсэн зургийг дурдан, "Хятадын нэг дарангуйлагч байх аа" гэж хариулсан нь Хятадын олон нийтийн дургүйцлийг төрүүлсэн байна.
БНХАУ-ын хувьд тус улсыг үндэслэгч Мао Зэдуныг шүүмжлэх, түүний дүрээр хошигнохыг хууль болон ёс зүйн хувьд хатуу хориглож, цахим орчинд чанд хянадаг дүрэмтэй билээ.
Энэхүү мэдэгдлийн дараа БНХАУ-ын нэр нөлөө бүхий томоохон компаниуд Мбаппетэй байгуулсан хамтын ажиллагааны гэрээгээ нэн даруй цуцалж эхлэв. Тухайлбал, ундаа үйлдвэрлэгч "Dongpeng Beverage" компани үндэсний сэтгэл зүйг хөндсөн аливаа үйлдлийг үл тэвчих бодлого баримталдаг гэдгээ мэдэгдэн гэрээгээ цуцалсан бол сүүний үйлдвэрлэлийн аварга "Mengniu Dairy" болон бяслаг үйлдвэрлэгч "Milkground" компаниуд хамтын ажиллагаагаа бүрэн зогсоосноо зарласан юм. Үүгээр зогсохгүй Хятадын "RedNote" цахим платформ түүнтэй холбоотой сурталчилгааны контентуудыг устгаж, шинээр дагагч нэмэх үйлдлийг нь хязгаарласан бөгөөд Хятадын телевизүүдээр Испанийн "Ла Лиг" тэмцээний тоглолтуудыг цацахыг түр зогсоосон тухай эх сурвалжууд мэдээлжээ.
Үүссэн нөхцөл байдалтай холбогдуулан Килиан Мбаппе албан ёсоор англи, франц болон хятад хэл дээр мэдэгдэл гарган уучлалт хүссэн байна. Тэрбээр уг үгээ сайн бодож тунгаагаагүй хэлснээ хүлээн зөвшөөрч, Хятадын ард түмэн болон дэлхий даяарх хятад иргэдийн сэтгэлийг шархлуулсандаа чин сэтгэлээсээ харамсаж буйгаа илэрхийлжээ. Мөн Испанийн "Ла Лиг" болон тус холбооны ерөнхийлөгч Хавьер Тебас албан ёсоор тайлбар хийж, хөлбөмбөг сонирхогчдоос хүлцэл өчсөн бөгөөд энэ нь тоглогчийн хувийн үзэл бодол байсныг сануулсан байна.
Харин БНХАУ-ын Гадаад хэргийн яамны хэвлэлийн төлөөлөгч Го Жиакунь ээлжит хэвлэлийн хурал дээрээ ард түмний сэтгэл хөндөгдсөн үед нийгмийн бүхий л хүрээнд нэгдсэн эсэргүүцэлтэй тулгарах нь жам ёсны үзэгдэл хэмээн мэдэгджээ.
Эх сурвалж:
• pbs.org
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.