Оросын хяналтад буй Олешки хотод гал зогсоох дэглэм хэрэгжиж эхэллээ
ОХУ болон Украин улс Херсон мужийн Оросын цэргийн хяналтад орших Олешки хотод хэсэгчилсэн хүмүүнлэгийн гал зогсоох дэглэмийг хэрэгжүүлж эхэллээ. Уг тохиролцоо 2026 өнөөдөр /2026.10.27/ Киевийн цагаар 03:00, Москвагийн цагаар 04:00 цагт албан ёсоор үйлчилж эхэлсэн юм. Украины Хүний эрхийн комиссар болон ОХУ-ын Батлан хамгаалах яам хоёр тал тохиролцсон бүсэд галаа зогсоож, хүлээсэн үүргээ биелүүлж байгааг албан ёсоор баталгаажуулсан байна.
Энэхүү зохицуулалтын хүрээнд энгийн номхон иргэдэд нэн шаардлагатай хүнс, цэвэр ус, эмнэлгийн хэрэгслийг хүргэх цувааг аюулгүй нэвтрүүлж, инженерийн тагнуул хийх болон тусламж нэн хэрэгцээтэй иргэд, өндөр настнуудыг нүүлгэн шилжүүлэх ажлыг төлөвлөөд байна.
Днепр мөрний зүүн эрэгт байрлах Олешки хот нь 2022 оны эхнээс Оросын талын хяналтад байгаа бөгөөд одоогоор тэнд 1700-2000 орчим оршин суугч хүнд нөхцөлд амьдарч байна. Мина тавьсан талбай болон нисгэгчгүй төхөөрөмжийн байнгын дайралтын улмаас гадаад ертөнцөөс тусгаарлагдсан тус хотод хоол хүнс, эм бэлдмэл, цахилгааны хомстол үүсээд байгаа юм. Хүмүүнлэгийн ажиллагааны дагуу иргэдийн нөхцөл байдлыг үнэлж, Украин эсвэл ОХУ руу нүүн шилжих хүсэлтэй хүмүүст аюулгүй гарц гаргахаар зорьж байна.
Энэхүү хүмүүнлэгийн тохиролцоог АНУ-ын Тэргүүн хатагтай Меланиа Трампын зуучлалаар байгуулсан бөгөөд тэрбээр Украины Дмитро Лубинец, ОХУ-ын Хүний эрхийн комиссар Яна Лантратова нартай олон улсын түншүүдийн оролцоотойгоор хамтран ажиллажээ.
Гал зогсоох дэглэм нь зөвхөн Олешки хот болон Херсоны фронтын тодорхой хэсэгт үйлчилж байгааг хоёр тал онцлов. Украины бусад бүс нутагт зэвсэгт мөргөлдөөн үргэлжилж байгаа бөгөөд ОХУ Киевийн дэд бүтэц болон Харьков зэрэг хотуудын тээвэр, эрчим хүчний байгууламжуудад баллистик пуужин, нисгэгчгүй төхөөрөмжөөр цохилт өгсөөр байгаа юм.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.