"Жоди" хочит үлэг гүрвэлийн араг яс 47.3 сая ам.доллароор зарагдлаа
Нью-Йорк хот дахь "Sotheby’s" дуудлага худалдааны ордонд "Жоди" хэмээн нэрлэсэн нанотираннус төрлийн үлэг гүрвэлийн ховор араг яс 47.3 сая ам.доллароор зарагдаж, анхны тооцооллыг хэд дахин даван гарлаа.
Урьдчилан тогтоосон 6-9 сая ам.долларын үнэлгээтэй уг үнэт олдворыг утсаар оролцсон нэрээ нууцалсан худалдан авагч 12 минутын турш үргэлжилсэн зургаан талт ширүүн өрсөлдөөний эцэст өөрийн болгосон байна.
Энэхүү өндөр үнийн дүн нь дуудлага худалдааны түүхэнд хоёрдугаарт бичигдэх хамгийн өндөр үнэтэй үлэг гүрвэлийн олдвор боллоо. Өмнө нь 44.6 сая ам.доллароор зарагдсан "Apex" хэмээх стегозаврын амжилтыг эвдсэн бөгөөд 50.1 сая ам.долларын үнэд хүрсэн "Gus" нэрт тираннозавр рексийн рекордын дараа орж байна.
Уг олдворыг анх 2019 онд Монтана муж улсын Жордан хотын нэгэн малчин хувийн эдлэнгийн газраасаа илрүүлжээ. Улмаар "Үлэг гүрвэлийн ковбой" хэмээн алдаршсан Клейтон Фиппс малтлага хийн гаргаж авсан түүхтэй юм.
2021 онд хувийн цуглуулагчийн эзэмшилд шилжсэн энэхүү араг ясыг 2023 онд Лондоны "Frieze Masters" урлагийн үзэсгэлэнд "Чомпер" нэрээр залуу тираннозавр рекс хэмээн зарлаж, 20 сая ам.доллароор үнэлэн дэлгэж байв.
Хожуу цэрдийн галавын үед буюу ойролцоогоор 67 сая жилийн өмнө амьдарч байсан тус олдвор нь хамрын үзүүрээс сүүл хүртэл 6 метр урт, тулгуур дээрээ бараг 3 метр өндөртэй нас бие гүйцсэн биет юм. Нэг биетийн 191 ширхэг чулуужсан яс, түүний дотор 53 яснаас бүрдсэн бүрэн шахуу гавлын яс болон 50 орчим шүд нь маш сайн хадгалагдан үлджээ. Сүүлийн үеийн судалгаагаар нанотираннусыг тираннозавраас тусдаа бие даасан төрөл гэдгийг хүлээн зөвшөөрсөн бөгөөд урт гарын сарвуу, том хумс, ир мэт зүсэгч шүд зэрэг бие бүтцийн 150 гаруй ялгааг эрдэмтэд тогтоосон байна.
Үлэг гүрвэлийн ховор араг яс ийнхүү хувийн эзэмшилд шилжсэн нь шинжлэх ухааны салбарынхны дунд томоохон маргаан дагууллаа. Сиракузын их сургуулийн доктор Линда Ивани болон доктор Томас Р. Хольц зэрэг судлаачид байгалийн дахин давтагдашгүй ховор олдвор музейн сан хөмрөг, судалгааны хүрээлэнгээс гадуур түгжигдэж, олон нийтийн хүртээл болон эрдэм шинжилгээний нарийвчилсан судалгаанаас холдох эрсдэл бий болсонд ихээхэн сэтгэл зовниж байгаагаа илэрхийлжээ.
Эх сурвалж:
• ua.news
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.