Колумбид оршуулгын үеэр талийгаачийн авсны дэргэд бинго тоглоцгоожээ
Колумбын Буэнавентура хотод нас барсан эмэгтэйг эцсийн замд нь үдэх ёслолын үеэр ар гэрийнхэн нь шарилын дэргэд бинго буюу лото тоглож буй бичлэг цацсан нь цахим орчинд вирус адил тархаад байна.
Цахим сүлжээнд тархсан дүрс бичлэгээс үзвэл гашуудагчид авсны эргэн тойронд тоглоомын карт барин зогсож, зарласан дугааруудыг тэмдэглэн тоглож байжээ.
Оршуулгын үеэр тоглоомын нэг ширхэг картыг талийгаачийн авсны таг дээр шууд байрлуулсан байв. Шарилын эргэн тойронд төрөл бүрийн цэцэгс, агаарын бөмбөлөг болон талийгаач эмэгтэйн хар цагаан гэрэл зургийг байрлуулсан байжээ. Хөтлөгч үсэг болон тооны хослолуудыг чангаар дуудан зарлахад цугласан хүмүүс чимээгүйхэн картан дээрээ тухайн дугааруудыг тэмдэглэж байсан нь бичлэгт тодорхой үлджээ.
Уламжлалт бус хэлбэрээр зохион байгуулагдсан уг үйл ажиллагааны үеэр оролцогчид туйлын тайван, нухацтай хандлагатай байсан бөгөөд хэн ч инээж хөхрөх, чанга хашхирах зэрэг зохисгүй үйлдэл гаргаагүй байна. Цугласан олон ямар ч шуугиангүйгээр, өөрсдийн тоглоомдоо анхаарал хандуулан талийгаачтай салах ёс гүйцэтгэж байгаа нь харагджээ.
Уг үйл явдал цахим сүлжээнд тарсны дараа иргэдийн дунд маргаан дагуулсан байна. Зарим хэрэглэгчид уг үйлдлийг талийгаачийг үл хүндэтгэсэн зохисгүй явдал хэмээн шүүмжилсэн бол нөгөө хэсэг нь соёлын онцлогтой холбон үзжээ.
Номхон далайн эрэг орчмын Афро-Колумбын уламжлалд хүнийг эцсийн замд нь үдэхдээ заавал уй гашууд автах бус, харин амьдралыг баяр баясгалантайгаар үдэх зан үйл үйлддэг байна. Мөн энэхүү тоглоомыг зохион байгуулсан нь талийгаач эмэгтэйн сүүлчийн хүсэлт байсан байж болзошгүй талаар эх сурвалжууд онцолжээ.
Эх сурвалж:
• dzen.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.