Франц улсад өрнөөд байгаа мөргөлдөөн Италид халдварлажээ
Франц улс даяар амьжиргааны өртөг нэмэгдсэн болон нийтийн үйлчилгээний таналтыг эсэргүүцсэн иргэдийн жагсаал мөргөлдөөн болон хувирч, эрх баригчид нийслэл Парис тэргүүтэй хэд хэдэн хотод хэсэгчилсэн хөл хорио тогтоон аюулгүй байдлын дэглэмийг эрс чангатгалаа.
Бямба гаргийн эсэргүүцлийн жагсаалд улс даяар 500-550 мянга гаруй иргэн, үүнээс Парис хотод 110 мянган хүн хамрагдсан байна. Сургуулийн орчин нөхцөл, санхүүжилтийг сайжруулахыг шаардсан оюутнуудын дөрвөн долоо хоногийн тэмцэл дээр үйлдвэрчний эвлэлүүд нэгдсэнээр шатахууны үнэ, амьжиргааны зардлын эсрэг томоохон хөдөлгөөн болж хувирчээ.
Гэвч тайван эхэлсэн жагсаалд хэт даврагч бүлэглэлүүд оролцсоноор цагдаа нартай мөргөлдөж, Лимож хотын захиргааны байр болон автомашинуудыг шатаан, 3000 гаруй дэлгүүрийг дээрэмдсэн байна. Мөргөлдөөний улмаас хоёр хүн амиа алдаж, 1000 орчим цагдаа бэртэж, 2500 орчим хүнийг саатуулжээ.
Үүссэн нөхцөл байдалтай холбогдуулан Францын Ерөнхий сайд Себастьян Лекорню бүс нутгийн удирдлагуудад хэсэгчилсэн хөл хорио тогтоох үүрэг өгсөн байна. Нийслэл Парис хотын Бүгд найрамдах улсын талбай болон "Ле-Аль" худалдааны бүсэд шөнийн 23:00 цагаас өглөөний 06:00 цагийн хооронд хөл хорио тогтоож, жагсагчид нэвтрэх замыг нь хаасан Луврын музейг түр хаажээ. Түүнчлэн Лилль, Дуэ, Ваттини, Денен зэрэг хойд бүсийн хотуудад шөнийн цагаар хөдөлгөөн хязгаарласан бол Ницце хотод насанд хүрээгүй иргэдийг шөнө асран хамгаалагчгүй гадуур явахыг хориглож, Марсель хотод бүх нийтийн жагсаал цуглааныг бүрэн зогсоосон байна.
Дотоод хэргийн сайд Лоран Нуньес цагдаагийн байгууллага нөхцөл байдлыг урьдчилан тооцоолоогүйн улмаас хяналтаа алдсаныг хүлээн зөвшөөрч, огцрох хүсэлт гаргасан ч Ерөнхийлөгч Эммануэль Макрон хүлээн авахаас татгалзлаа. Ерөнхийлөгч Макрон хүчирхийллийг буруушааж, тагнуул болон тактикийн алдааг шалгах үүрэг өгсөн бөгөөд сүйтгэгчдэд санхүүгийн болон эрүүгийн хариуцлага тооцохоо илэрхийлэв.
Хууль зүйн сайд Жеральд Дарманен баривчлагдсан этгээдүүдийг 72 цаг хүртэл хорих, утасны яриаг чагнах, нийгмийн сүлжээний бичлэгт царай таних технологи ашиглан гэмт хэрэгтнүүдийг олж тогтоохоор ажиллаж эхэлснийг мэдэгдсэн байна.
Францад өрнөсөн үймээн хөрш зэргэлдээ орнуудад нөлөөлж, Италийн Милан хотод амьжиргааны зардлыг эсэргүүцсэн мөргөлдөөн гарсан тул тус улсын удирдлагууд урьдчилан сэргийлэх арга хэмжээ авчээ. Европын хэд хэдэн улс өөрсдийн иргэдийг Франц дахь жагсаал цуглааны бүсээс зайлсхийхийг анхааруулсан аяллын зөвлөмж гаргаад байна. Хэрэв эмх замбараагүй байдал намжихгүй бол Францын эрх баригчид улсын хэмжээнд онц байдал зарлахаас өөр аргагүйд хүрч болзошгүй байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.