АНУ-д түлшний үнэ түүхэнд байгаагүйгээр цойлов
АНУ-д дизель түлшний дундаж үнэ нэг галлон нь 5.85 ам.долларт хүрч, түүхэн дэх хамгийн дээд хэмжээндээ хүрлээ.
Америкийн автомашины холбооны (AAA) мэдээлснээр, 2026 оны есдүгээр сарын 4-ний баасан гарагт бүртгэгдсэн уг өсөлт нь Ойрхи Дорнодын мөргөлдөөн болон дэлхийн хэмжээнд үүссэн нийлүүлэлтийн тасалдалтай шууд холбоотой юм. Шатахууны үнийн огцом өсөлт нь тээвэр, хөдөө аж ахуйн салбарт хүнд цохилт болж, инфляцыг хөөрөгдөх гол хүчин зүйл болж байна.
Шатахуун хяналтын "GasBuddy" үйлчилгээний мэдээлснээр есдүгээр сарын 3-ны байдлаар үнэ 5.820 ам.долларт хүрчээ. Энэ нь 2022 оны зургадугаар сард Оросын Украинд хийсэн түрэмгийллийн дараа тогтож байсан 5.82 ам.долларын дээд амжилтыг давсан үзүүлэлт юм. Жилийн өмнө дизель түлшний дундаж үнэ 3.71 ам.доллар байсан бол 2026 оны хоёрдугаар сарын сүүлчээр Ойрхи Дорнодод мөргөлдөөн эхлэхийн өмнө 3.76 ам.доллар байв. Үүний зэрэгцээ ердийн хар тугалгагүй бензиний үнэ нэг галлон нь 4.15 ам.доллар болж өссөн нь мөргөлдөөн эхэлснээс хойш бараг 40 хувиар өссөн үзүүлэлт юм. Калифорни зэрэг зарим мужид дизель түлшний үнэ 6.81 ам.долларт хүрчээ.
Үнийн урьд өмнө байгаагүй өсөлтөд хоёр том хямрал нөлөөлж байна.
Нэгдүгээрт, 2026 оны хоёрдугаар сарын сүүлчээр эхэлсэн АНУ-Израил болон Ираны хоорондох зургаан сар үргэлжилсэн мөргөлдөөний улмаас Иран улс Ормузын хоолойг хаасан. Дэлхийн газрын тосны тавны нэг орчим хувь нь дамжин өнгөрдөг уг чухал усан замыг хааснаар түүхий тосны нийлүүлэлт эрс багасжээ. Хоёрдугаарт, Украины дроны довтолгоо Оросын газрын тос боловсруулах үйлдвэрүүдийг сүйтгэсний хариуд Москва дизель түлшний экспортын бүрэн хоригоо есдүгээр сарын эцэс хүртэл сунгасан байна. Орос болон Персийн булангийн орнуудын гарц хумигдсанаар далайгаар тээвэрлэдэг дизель түлшний 20 орчим хувь нь зах зээлээс хасагджээ.
Дэлхийн бөмбөрцгийн хойд хагаст намрын ургац хураалтын улирал эхэлж, өвлийн улирал угтан халаалтын тос нөөцөлж байгаа нь нийлүүлэлтийн дарамтыг улам нэмэгдүүлж байна. Эрчим хүчний шинжээчид дизель түлшийг "эдийн засгийн амин судас" хэмээн тодорхойлж, одоогийн үнэ нь өрхийн төсөв болон бизнесийн ашигт ажиллагаанд заналхийлж байгааг анхаарууллаа.
Америк, Британийн тариаланчид ургац хураалтын үеэр трактор, комбайн зэрэг хөдөө аж ахуйн техникээ ажиллуулахад өндөр зардал гаргаж байна. Түүнчлэн ачааны машин, галт тэрэг, усан онгоцууд дизель түлшээр ажилладаг тул тээврийн нэмэлт зардал нь хүнсний бүтээгдэхүүн, өргөн хэрэглээний барааны үнийг шууд өсгөхөд хүргэж байна.
Шатахууны үнийг бууруулах зорилготой Венесуэлийн хэлэлцээр урт хугацаандаа үр дүнгээ өгөх хүлээлттэй байгаа ч ойрын хугацаанд дизель түлшний хомстол дэлхийн зах зээлд нөлөөлсөн хэвээр байх төлөвтэй байна. Ойрхи Дорнодын геополитикийн тогтворгүй байдал болон Оросын экспортын хориг үргэлжилж байгаа нөхцөлд эрчим хүчний үнийн хэлбэлзэл ирэх өвлийн улиралд дэлхийн эдийн засагт томоохон сорилт дагуулсаар байх боллоо.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.