Оросын хошууч генерал халдлагад өртөж хүнд шархаджээ
ОХУ-ын Саратов мужид тус улсын зэвсэгт хүчний өндөр албан тушаалтан, хошууч генерал Николай Варпаховичийн амь насанд халдахыг завдсан хэрэг гарч, тэрээр хүнд шархадсан байна.
Украины нийслэл Киев хотын хүүхдийн хамгийн том эмнэлэг рүү пуужингийн цохилт өгөх тушаал гаргасан хэмээн буруутгагдаж байсан түүнийг 2026 оны есдүгээр сарын 3-ны пүрэв гаргийн өглөө үл мэдэгдэх этгээд буудаж шархдуулжээ. Халдлага Энгельс дүүргийн Пробуждение тосгонд, Оросын алсын зайн бөмбөгдөгч онгоцны дивиз байрладаг "Энгельс-2" цэргийн баазын ойролцоо болсон байна.
Халдлага өглөөний 07:00 цагийн орчимд генерал Николай Варпаховичийг хувийн сууц болон дэлгүүрийн гадна байх үед гарчээ. Дуулга өмссөн үл таних этгээд мотоциклоор ойртон ирж, түүн рүү гал нээгээд хэргийн газраас зугтсан байна. Генерал хэвлий болон нүүрэн тус газраа хоёр удаа буудуулж, Саратов хотын эмнэлэгт маш хүнд байдалтай хүргэгджээ. Эмч нар түүний биеэс сумыг гаргаж авсан бөгөөд цаашдын эмчилгээг үргэлжлүүлэхээр Москва хот руу тусгай нислэгээр тээвэрлэхээр төлөвлөж байгаа аж. Халдлагын үеэр түүний жолооч мөн шархадсан ч зугтаж чадсан бөгөөд яаралтай тусламж дуудсанаар тэдний амь насыг аварчээ.
Уг зэвсэгт халдлага гарахаас ердөө гурав хоногийн өмнө буюу 2026 оны наймдугаар сарын 31-ний өдөр Украины Аюулгүй байдлын алба болон Ерөнхий прокурорын газраас Николай Варпаховичийг дайны гэмт хэрэгт буруутгаж, эчнээгээр эрүүгийн хэрэг үүсгэсэн байв.
Украины мөрдөн байцаагчид түүнийг Оросын Гвардийн хүнд бөмбөгдөгч авиацийн 22-р дивизийн командлагчийн хувиар 2024 оны долоодугаар сарын 8-ны өдөр Киев хотын "Охматдет" хүүхдийн эмнэлэг рүү пуужингийн цохилт өгөх тушаалыг биечлэн өгсөн гэж үзжээ. Тус халдлагыг түүний удирдлага доорх "Ту-95МС" бөмбөгдөгч онгоцноос харвасан "Х-101" далавчит пуужингаар үйлдсэн болохыг тогтоосон байна.
Киев хотын хүүхдийн эмнэлэгт туссан пуужингийн цохилтын улмаас хоёр насанд хүрсэн хүн амиа алдаж, есөн хүүхэд зэрэг олон арван хүн шархадсан юм. Халдлагад эмнэлгийн хорт хавдар, мэс засал, эрчимт эмчилгээ, хордлого тайлах тасгууд өртөж, барилга байгууламж нь ноцтой сүйджээ. Украины тал энэхүү эмгэнэлт явдлыг дайны гэмт хэрэг хэмээн зарлаж, буруутай этгээдүүдийг олон улсын хэмжээнд эрэн сурвалжилж эхэлсэн байна.
ОХУ-ын Мөрдөн байцаах хорооноос цэргийн албан хаагчийн амь насанд халдахыг завдсан болон хууль бусаар зэвсэг эзэмшсэн гэх үндэслэлээр эрүүгийн хэрэг үүсгэн шалгаж эхэлснээ мэдэгдэв. Харин Украины Ерөнхийлөгч Володимир Зеленский халдлагын дараа хийсэн өдөр тутмын мэдэгдэлдээ энэхүү хэрэгт Украины тал оролцсон байж болзошгүйг шууд бусаар илэрхийлжээ. Тэрбээр Оросын гэмт хэрэгтнүүд хаана ч нуугдсан олно гэдгийг онцлоод, Саратов мужид болсон явдал үүний нэг баталгаа бөгөөд цаашид ч асимметрик ажиллагаануудыг үргэлжлүүлэн явуулахаа мэдэгдсэн байна.
Энэхүү үйл явдал нь дайны гэмт хэрэгт буруутгагдаж буй Оросын цэргийн өндөр албан тушаалтнууд өөрийн нутаг дэвсгэрт ч аюулгүй байдлаа бүрэн хангаж чадахгүй байгааг харуулж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.