Ормузын хоолойгоор дамжих ачаа тээвэрлэлт эрс буурчээ
АНУ болон Ираны хооронд цэргийн мөргөлдөөн хурцадсаны улмаас стратегийн чухал ач холбогдолтой Ормузын хоолойгоор дамжин өнгөрөх ачаа тээврийн хөлөг онгоцны хөдөлгөөн цөөрч, сүүлийн 10 хоногийн дунджаас доогуур түвшинд хүрчээ.
“Kpler” компанийн хөлөг онгоцны хяналтын урьдчилсан мэдээллээр, есдүгээр сарын 1-ний мягмар гаргийн байдлаар тус хоолойгоор ердөө дөрвөн тээврийн хөлөг онгоц дамжин өнгөрсөн нь өмнөх өдрийн 10 хөлөг онгоцноос буурсан үзүүлэлт байна. Тухайн бүс нутагт үүссэн аюулгүй байдлын тогтворгүй байдал нь дэлхийн эрчим хүчний түүхий эдийн тээвэрлэлтэд саад учруулж эхэллээ.
Ормузын хоолойгоор мягмар гаргийн байдлаар дамжин өнгөрсөн дөрвөн хөлөг онгоцны нэг нь том хэмжээний түүхий газрын тос тээвэрлэгч (VLCC), нэг нь Панамакс ангиллын танкер, нэг нь Камсармакс ангиллын ачааны хөлөг онгоц, үлдсэн нэг нь дунд хэмжээний танкер байжээ. Эдгээр хөлөг онгоцны нэг нь хоолой руу нэвтэрсэн бол гурав нь гарсан чиглэлд явсан байна. Тээврийн салбарын шинжээчдийн тайлбарлаж буйгаар, бүс нутагт зорчиж буй олон тооны арилжааны хөлөг онгоцууд өөрсдийн байршил тогтоох төхөөрөмжөө (AIS) унтрааж байгаа тул бодит тоо баримт үүнээс зөрж магадгүй байна. Хөлөг онгоцууд халдлагад өртөхөөс сэргийлж, илрүүлэлтээс зайлсхийхийн тулд нууцаар зорчих аргыг сонгожээ.
Тээвэрлэлтийн хэмжээ огцом буурсан нь бүс нутгийн аюулгүй байдал суларч, цэргийн мөргөлдөөн идэвхжсэнтэй шууд холбоотой юм.
Ойрхи Дорнодын далайн тээврийн өөр нэгэн чухал гарц болох Баб-эль-Мандебын хоолойд мөн адил тээвэрлэлтийн идэвхжил суларчээ. Мягмар гаргийн байдлаар тус хоолойгоор ердөө 18 түүхий эдийн хөлөг онгоц дамжин өнгөрсөн нь сүүлийн 10 хоногийн дундаж болох 24 транзитаас бага үзүүлэлт юм. Эдгээр хөлөг онгоцны дотор Афрамакс ангиллын хоёр танкер, Суэцмакс ангиллын нэг танкер байсан бөгөөд долоон хөлөг онгоц хоолой руу нэвтэрч, 11 нь гарсан чиглэлд зорчсон байна.
Ормузын болон Баб-эль-Мандебын хоолой дахь тээвэрлэлтийн саатал нь дэлхийн эрчим хүчний зах зээлд нийлүүлэлтийн хомстол үүсгэж, түүхий эдийн үнэ өсөх эрсдэлийг нэмэгдүүлж байна. Цэргийн мөргөлдөөн цаашид хэрхэн өрнөхөөс шалтгаалж далайн тээврийн компаниуд чиглэлээ өөрчлөх эсвэл тээвэрлэлтээ бүрмөсөн зогсооход хүрч болзошгүй байгаа бөгөөд олон улсын зүгээс бүс нутгийн хурцадмал байдлыг намжаах арга замыг эрэлхийлж байгаа аж.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.