Орос улс Курилийн арлуудын орчимд пуужингийн харвалттай цэргийн сургуулилалт хийлээ
Оросын Холбооны Улсын Номхон далайн флот Япон улстай маргаантай байдаг өмнөд Курилийн арлуудын орчимд байлдааны галтай пуужингийн сургуулилалт хийлээ.
2026 оны наймдугаар сарын 20-ны пүрэв гарагт болсон уг ажиллагаа нь Москва болон Токиогийн хооронд дипломат харилцаа эрс хурцадсан үетэй давхцаж байна. Оросын Батлан хамгаалах яамнаас мэдээлснээр, төлөвлөгөөт сургуулилалтын үеэр дайсны байлдааны хөлөг онгоцуудын довтолгоог няцаах зохиомол хамгаалалтын цохилтуудыг амжилттай гүйцэтгэжээ.
Сургуулилалтад Номхон далайн флотын тэргүүлэгч хөлөг болох "Варяг" пуужингийн крейсер оролцож, "Вулкан" ангиллын хөлөг эсэргүүцэгч хоёр пуужин харвасан байна. Үүний зэрэгцээ цөмийн хөдөлгүүрт "Омск" шумбагч онгоцноос "Гранит" далавчит пуужингийн цуврал харвалт хийсэн бол Итуруп арал дээр байрлаж буй "Бастион" эргийн пуужингийн системээс "Оникс" пуужинг хөөргөжээ. Сургуулилалтын байг 300 гаруй километрийн зайд байрлуулсан бөгөөд бүх пуужин байндаа амжилттай туссаныг албаныхан баталлаа. Аюулгүй байдлыг хангах үүднээс ажиллагаа эхлэхээс өмнө далайн болон агаарын бүсийг иргэний тээврийн хөлгүүдэд хаасан байна.
Эдгээр сургуулилалт болохоос өмнө буюу 2026 оны наймдугаар сарын 13-ны өдөр ОХУ-ын Ерөнхийлөгч Владимир Путин маргаантай арлуудын хамгийн том нь болох Итуруп аралд айлчлал хийсэн юм. Энэ нь түүний Ерөнхийлөгчийн албан тушаалыг хаших хугацаандаа тус аралд хийсэн анхны айлчлал боллоо.
Японы Ерөнхий сайд Санаэ Такаичи болон Гадаад хэргийн сайд Тошимицү Мотэги нарын засаг захиргаа В.Путины айлчлалыг эрс буруушааж, "хэрхэвч хүлээн зөвшөөрөх боломжгүй" үйлдэл хэмээн мэдэгдээд, хоёр талын харилцаанд ан цав суулгана хэмээн анхааруулсан юм.
Аюулгүй байдлын шинжээчдийн үзэж буйгаар, Оросын тал маргаантай арлууд дээр цэргийн сургуулилалт хийж, Ерөнхийлөгч нь биечлэн очсон нь Кремль Токиогийн эсрэг байр сууриа улам чангаруулж буйн илрэл юм. Япон улс Украины дайнтай холбогдуулан Москвагийн эсрэг хориг арга хэмжээ авсаар байгаа энэ үед Оросын зүгээс эдгээр арлуудыг цаашид "маргаантай газар нутаг" гэж үзэхгүй бөгөөд Ази, Номхон далайн бүс нутаг дахь цэргийн оролцоогоо улам бэхжүүлнэ гэдгээ илэрхийллээ.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.