Марк Зукерберг Ирландад эртний шилтгээн худалдан авчээ
"Мета" компанийн гүйцэтгэх захирал, тэрбумтан Марк Зукерберг Ирландын зүүн өмнөд хэсэгт орших 19 дүгээр зууны үеийн эртний шилтгээнийг худалдан авчээ.
Тэрээр гэр бүлийн хамт Уотерфорд мужийн Блэкуотер голын эрэгт байрлах "Странкалли" (Strancally Castle) хэмээх эртний шилтгээнийг зах зээлээс гадуурх хэлцлээр хэдэн долоо хоногийн өмнө өөрсдийн өмчлөлд шилжүүлэн авсан байна. Шилтгээний үнийг нууцалж байгаа ч шинжээчид уг үл хөдлөх хөрөнгийг 20-30 сая евро буюу ойролцоогоор 23.3-35 сая ам.доллароор үнэлэгдсэн гэж таамаглаж байна.
Странкалли шилтгээн нь 1830 оны орчимд Парламентын гишүүн асан Жон Кейлид зориулагдан баригдсан, Готик сэргэн мандалтын үеийн уран барилгын хосгүй бүтээл юм. Алдартай архитектор Жеймс болон Жорж Ричард Пэйн нарын зураг төслөөр боссон уг ордон нь 16 мянган хавтгай дөрвөлжин фут талбайтай бөгөөд 440 акр (178 гектар) эдлэн газартай ажээ. Шилтгээн дотор 11 унтлагын өрөө, цамхаг доторх дөрвөн тусгай өрөө, чулуун чимэглэл бүхий байгууламж болон Блэкуотер гол руу шууд гарах усан онгоцны зогсоол байрладаг. Түүхэн сурвалжид тэмдэглэснээр, уг барилга нь маш том хэмжээтэй тул хоолны өрөөнөөс гал тогоо хүртэл хурдан алхахад дөрвөн минут хагасын хугацаа зарцуулдаг байна.
Сүүлийн жилүүдэд технологийн салбарын тэрбумтнууд Ирландын түүхэн эдлэн газруудыг худалдан авах хандлага нэмэгдэж байна. Тухайлбал, "Stripe" компанийг хамтран үүсгэн байгуулагч Жон Коллисон 2021 онд "Эбби Лейкс" эдлэнг 20 сая еврогоор авсан бол алдарт зохион бүтээгч Жеймс Дайсон 2024 онд Блэкуотер голын хөндийд байрлах "Баллинатрей" харшийг 29-30 сая еврогоор худалдан авч байжээ.
Эх сурвалж:
• inc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.