БНСУ, АНУ хамтарсан цэргийн сургуулилалтын хугацааг богиносгожээ
Бүгд Найрамдах Солонгос Улс болон АНУ-ын зэвсэгт хүчний хамтран зохион байгуулж буй зуны “Ulchi Freedom Shield” цэргийн сургуулилалтыг төлөвлөсөн хугацаанаас нь долоо хоногийн өмнө буюу наймдугаар сарын 21-нд дуусгахаар болжээ.
Анх наймдугаар сарын 17-нд эхэлсэн сургуулилалт 11 хоног үргэлжилж, наймдугаар сарын 27-нд дуусахаар төлөвлөгдсөн байсан ч шинэчилсэн хуваарийн дагуу тав хоногийн хугацаанд зохион байгуулахаар болсон байна.
Ингэснээр сөрөг давшилтын ажиллагаанд чиглэсэн хоёр дахь шатны сургуулилалтыг цуцалж, БНАСАУ-ын болзошгүй халдлагын эсрэг хамгаалалтын ажиллагаанд төвлөрөхөөр болжээ.
Мөн хээрийн болон бодит сургуулилалтын хэмжээг бууруулж, зарим ажиллагааг компьютерын симуляциар явуулахаар болсон байна. АНУ-ын Ерөнхийлөгч Дональд Трамп наймдугаар сарын 16-нд Батлан хамгаалахын сайд Пит Хегсетэд сургуулилалтын цар хүрээг багасгах чиглэл өгсөн нь уг шийдвэрийн үндэс болсон байна. Трамп БНАСАУ-ын удирдагч Ким Жон Унтай сайн харилцаатай байгаагаа онцолж, ийм хэмжээний хамтарсан сургуулилалт нь Пхеньянд дайсагнасан дохио өгч болзошгүй гэж үзжээ.
Мөн сургуулилалт өндөр зардалтай бөгөөд зардлын ихэнхийг АНУ хариуцдагийг шүүмжилсэн байна. Харин БНСУ-ын тал уг шийдвэрийг гэнэтийн бөгөөд ер бусын үйл явдал гэж үзэж байна. Гадаад хэргийн сайд Чо Хён парламентын сонсголын үеэр АНУ-ын шийдвэрийн талаар урьдчилан мэдэгдээгүй бөгөөд олон нийтийн сүлжээгээр мэдээлсний дараа мэдсэн гэжээ.
Пентагон сургуулилалтын хугацаа, цар хүрээг бууруулсан ч БНСУ-ын цэргийн бэлэн байдал болон сургуулилалтын үндсэн зорилгод сөргөөр нөлөөлөхгүй гэж мэдэгдсэн байна. Үүнтэй холбоотойгоор БНСУ-ын Ерөнхийлөгч И Жэ Мён дайны үед тус улсын зэвсэгт хүчнийг бие даан удирдах хяналтыг АНУ-аас шилжүүлэн авах шаардлагыг дахин тавьжээ. Мөн БНСУ-ын өөрийн батлан хамгаалах чадавхыг нэмэгдүүлж, цөмийн хөдөлгүүрт шумбагч онгоц бүтээх зэрэг батлан хамгаалахын дотоодын чадавхыг түргэтгэхийг уриалсан байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.