Эбола вирусийн дэгдэлтээр нас барсан хүний тоо мянга давлаа
Бүгд Найрамдах Ардчилсан Конго Улс болон Уганда улсад хурдацтай тархаж буй Эбола вирусийн дэгдэлтийн улмаас нас барсан хүний тоо 1031-д хүрч, аюултай хэмжээнд хүрснийг Африкийн Өвчний хяналт, урьдчилан сэргийлэх төвийн (Africa CDC) Ерөнхий захирал, доктор Жан Касея мэдэгдлээ.
Өнөөдрийн байдлаар тус вирусийн халдварын батлагдсан тохиолдол 2473-2557-ын хооронд бүртгэгдээд байгаагаас нас баралтын түвшин ойролцоогоор 40.5 хувьтай байна. Халдвар авсан өвчтөнүүдээс 737 хүн эмнэлэгт тусгаарлагдан эмчлүүлж байна.
Халдварын голомт болох Конго улсын Итури мужид анх тавдугаар сарын дундуур дэгдэлт эхэлсэн бөгөөд одоогоор тус улсын зүүн мужууд болох Хойд Киву, Өмнөд Киву, Дээд Уэле, Чопо зэрэг газруудыг хамраад байна. Мөн Уганда улсын нийслэл Кампала хотод зөөвөрлөгдсөн тохиолдол бүртгэгдсэнээс гадна Герман, Франц улсад тус бүр нэг тохиолдол бүртгэгджээ.
Энэ удаагийн дэгдэлт нь хамгийн хурдацтай тархаж буй Эбола вирусийн дэгдэлтээр бүртгэгдэж байна. Уг тахал "Бундибугио" (BDBV) хэмээх вирусийн омгоор үүсгэгдсэн. Одоогийн байдлаар анагаах ухаанд ашиглаж буй үр дүнтэй вакцин, эмчилгээнүүд нь зөвхөн "Заир" омгийн эсрэг зориулагдсан тул эмнэлгийн ажилтнуудад Бундибугио омгийн эсрэг батлагдсан вакцин болон тусгай эмчилгээ байхгүй байгаа нь нөхцөл байдлыг улам хүндрүүлж байна.
Эх сурвалж:
• cdc.gov
•
• who.int
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.