Ойн хээрийн гал түймрийн улмаас Торонто хотын агаарын чанар эрс мууджээ
Канадын Онтарио мужийн баруун хойд хэсэгт гарсан ойн түймрийн улмаас Торонто хотын агаарын бохирдол эрс муудаж, аюултай нөхцөл байдал үүсээд байна.
Олон улсын "IQAir" байгууллагын мэдээлснээр, Торонто хот долоодугаар сарын 15, 16-ны өдрүүдэд дэлхийн хамгийн их агаарын бохирдолтой хотуудын жагсаалтыг тэргүүлжээ. Одоогийн байдлаар Канад улсын хэмжээнд 800 гаруй түймэр идэвхтэй байгаагаас Онтарио мужид 100 гаруй голомт асч, тэдгээрээс гарсан өтгөн утаа Торонто болон бусад зэргэлдээх хотуудыг бүрхсэн байна.
Цаг уурын "Environment Canada" байгууллагаас агаарын чанарын аюултай түвшнийг илтгэх "Улбар шар" (Orange Alert) сэрэмжлүүлгийг гаргажээ. Өтгөн шар, улбар шар өнгийн манан татсаны улмаас хотын үзэгдэх орчин эрс хязгаарлагдаж, алслагдсан өндөр барилга байгууламжууд харагдахгүй хэмжээнд хүрчээ.
Агаарын ноцтой бохирдлын улмаас хотын захиргаа олон нийтийг хамарсан томоохон арга хэмжээнүүдийг цуцлах шийдвэр гаргав. Тухайлбал, Торонто хотноо зохион байгуулагдаж байсан 2026 оны хөлбөмбөгийн Дэлхийн аварга шалгаруулах тэмцээний (FIFA World Cup) хагас шигшээ тоглолтын үзэгчдийн наадам (Fan Festival) болон бусад гадаах арга хэмжээнүүдийг цуцалжээ. Мөн хүүхдийн зуслангийн (CampTO) үйл ажиллагаа, гадаа байрлах усан сан, тоглоомын талбайнуудыг хааж, хүүхдүүдийн үйл ажиллагааг дотор танхимд шилжүүлсэн байна.
Агаарын чанар муудсан нь Торонтод тохиож буй хэт халалттай зэрэгцэн явагдаж байгаа нь нөхцөл байдлыг улам хүндрүүлж байна. Эрүүл мэндийн байгууллагуудаас иргэдийг гэрээсээ гарахгүй байхыг зөвлөж байгаа бөгөөд ялангуяа өндөр настан, хүүхэд, жирэмсэн эмэгтэйчүүд болон амьсгалын замын өвчтэй хүмүүсийг онцгой анхаарал болгоомжтой байхыг сануулж байна.
Эх сурвалж:
• cbc.ca
• dawn.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.