"Бави" хар салхины улмаас Хятадад 2.2 сая гаруй хүнийг нүүлгэн шилжүүлжээ

БНХАУ-д "Бави" хар салхины улмаас 2.2 сая гаруй хүнийг аюулгүй бүсэд яаралтай нүүлгэн шилжүүлээд байна.

Номхон далайд үүсэхдээ салхины хурд нь 290 км/цаг хүрч 2026 онд Хятадын эх газрыг дайрсан хамгийн хүчтэй хар салхи болжээ. Одоогоор хүч нь суларч халуун орны шуурганы ангилалд шилжсэн ч хойд бүс нутгуудад их хэмжээний аадар бороо, үерийн аюул дагуулаад байна.

"Бави" хар салхи долоодугаар сарын 11-нд Жэжян мужийн Юйхуань хотод газардсан бөгөөд удалгүй Вэньжоу хотын ойролцоох Юэчин хотыг дайран өнгөрөхдөө салхины хурд 144 км/цаг хүрсэн байна.

Энэ нь 1949 оноос хойш долоодугаар сард Жэжян мужид газардсан хамгийн хүчтэй хар салхиар бүртгэгджээ. Гамшгийн улмаас Жэжян, Фужянь муж болон Шанхай хотод нийт 2.2 сая гаруй иргэнийг нүүлгэн шилжүүлсэн бол Ляонин мужид хүчтэй үерийн улмаас 260 мянга гаруй хүнийг аюулгүй бүсэд шилжүүлсэн байна.

Мөн Шэньян, Жилин хотуудад бүх шатны сургуулийн үйл ажиллагааг түр зогсоож, олон зуун нислэг, галт тэрэгний хөдөлгөөнийг цуцалжээ. Хар салхи Хятадад хүрэхээс өмнө Филиппинд хүчтэй аадар бороо, хөрсний гулсалт үүсгэж 17 хүний аминд хүрсэн бол Тайвань болон Японы өмнөд арлуудад хүчтэй салхи, аадар бороо орж, олон мянган өрх цахилгаангүй болсон байна.

Хятадын Үндэсний цаг уурын төвөөс үер, усны аюулын улаан болон улбар шар түвшний сэрэмжлүүлгийг хэвээр хадгалж, гамшгаас хамгаалах арга хэмжээг үргэлжлүүлэн хэрэгжүүлж байна.