ЦУОШГ: Зарим гол үерийн түвшинг 47 см хүртэл даван үерлэж байна

Цаг уур, орчны шинжилгээний газраас долоодугаар сарын 12-ны өдрийн байдлаарх гол мөрний усны түвшний мэдээллийг танилцууллаа. 

Өнөөдрийн байдлаар Үүр гол Цагаан-Үүр сумын нутагт, Сэлбэ гол Санзай амралтын орчимд, Халх гол Сүмбэр, Ялалт багийн орчимд, Хараа гол Дархан хотын орчимд, Ховд гол Мянгад сумын орчимд, Туул гол Лүн сумын орчимд, Сөгнөгөр гол Сөгнөгөр амралтын орчимд үерийн түвшнээс 2-47 см-ээр даван үерлэж байна.

Иймд дээрх голууд болон бусад гол мөрний сав дагуу аялж, амарч буй иргэдийг голын эрэг, хөвөө дагуу буудаллаж, суурьшихгүй байх, бага насны хүүхдэд тавих хараа хяналтаа сайжруулах, мөн үерлэсэн болон усны түвшин нэмэгдсэн гол мөрөнд орохгүй байхыг онцгойлон анхаарууллаа.