БНСУ-ын Ерөнхийлөгч И Жэ Мён гэргийн хамт монголчуудын хийсэн ттокбукки, кимбап, манду зэргийг амтархан зоогложээ

БНСУ-ын Ерөнхийлөгч И Жэ Мён гэргий Ким Хе Гёны хамт 2026 оны долоодугаар сарын 9-ний өдөр Улаанбаатар хотын Сөүлийн гудамжинд гэнэтийн зочлолт хийж, хотын иргэдтэй уулзлаа. Хос Сөүлийн гудамжинд ирэх үед цугларсан иргэд солонгос хэлээр мэндчилж, халуун дотноор угтан авсан байна.

Сөүлийн гудамжинд цугларсан иргэд БНСУ-ын Ерөнхийлөгчийн хосыг "Аннёнхасэю" болон "Бангапсымнида" хэмээн солонгос хэлээр угтан авсан бөгөөд Ерөнхийлөгч И Жэ Мён тэдэнтэй гар барьж, найрсгаар мэндчилжээ. Тэрээр гэргийн хамт гудамжны хоолны цэгээр зочилж, солонгос үндэсний уламжлалт хоол болох ттокбукки, кимбап, манду зэргийг амтархан зооглосон байна. Мөн тус гудамжинд байрлах уламжлалт "Сөүл Жүн" асар барилгын өмнө дурсгалын зураг татуулжээ.

Хос Сөүлийн гудамжинд хийсэн зочлолтоо тус улсын иргэний эзэмшдэг "Корэбүл" хэмээх солонгос ресторанд оройн зоог барьснаар өндөрлүүлэв. Тэдний оройн зоогт дүпү-кимчи, шарсан макрель загас болон бибимбап зэрэг хоолнууд багтсан байна. БНСУ-ын Ерөнхийлөгчийн тамгын газрын хэвлэлийн төлөөлөгчийн орлогч Ан Гүй Рён энэхүү зочлолтын талаар мэдээлэхдээ, иргэдтэй шууд харилцах замаар олон жилийн түүхтэй найрамдалт харилцааг бататгах зорилготой байсныг онцолжээ.