Саудын Арамко компанийн төв байр пуужингийн цохилтод өртлөө
Саудын Арабын Дхран хотод байрлах газрын тосны "Saudi Aramco" компанийн төв оффисын цогцолбор баллистик пуужингийн цохилтод өртөж, барилгад гал гарсан байна. Мягмар гаргийн орой болсон уг халдлагын дараа онцгой байдлын болон иргэний хамгаалалтын албаныхан шуурхай ажиллан галыг бүрэн хязгаарласан бөгөөд хүний амь нас эрсдээгүй, бэртэж гэмтсэн тохиолдол гараагүй болохыг Саудын Арабын Эрчим хүчний яам мэдэгдлээ.
Компанийн эх сурвалжуудын мэдээлснээр баллистик пуужин төв цогцолборын оффисын өндөр цамхгийг оносны улмаас барилгын хамгийн дээд гурван давхар эвдэрч сүйдсэн байна. Дхран дахь тус цогцолбор нь тус улсын эх газар болон далайн өрөмдлөгийн цамхгууд, хоолойн сүлжээ, газрын тос экспортлох терминалуудыг удирдан чиглүүлдэг үйл ажиллагааны стратегийн гол түшиц газар юм.
Энэхүү халдлагыг Йемений хусит босогчид үйлдсэн бөгөөд тэд сүүлийн үед сэргэсэн бүс нутгийн тулааны улмаас Саудын эрчим хүчний байгууламжуудыг бай болгохоо өмнө нь анхааруулж байжээ. Мөн уг халдлагатай зэрэгцэн Саудын Арабын агаарын довтолгооноос хамгаалах системүүд нийслэл Эр-Рияд болон өмнөд бүс нутгийг чиглэсэн дронууд болон пуужингуудыг амжилттай тосон устгасан байна. Гэсэн хэдий ч Эр-Рияд хотод сөнөөгдсөн хоёр пуужингийн үлдэгдэл унасны улмаас дөрвөн энгийн иргэн бэртэж, 15 орчим орон сууцны байшин бага зэргийн эвдрэлд өртжээ.
Халдлагын хариуд Саудын тэргүүлсэн олон улсын эвсэл хуситуудын мэдэлд буй цэргийн болон түлшний дэд бүтцүүдэд агаараас хариу цохилт өгч эхэлсэн бөгөөд Йемений нийслэл Сана хот дахь түлшний агуулахуудыг онилсон байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.