Канад улсад Батлан хамгаалахын олон улсын банк байгуулагдана

Турк улсын Анкара хотноо болсон НАТО-гийн дээд хэмжээний уулзалтын үеэр Канадын Ерөнхий сайд Марк Карни "Батлан хамгаалах, аюулгүй байдал, тэсвэрлэх чадавхын банк" (DSRB)-ийг байгуулах санаачилгыг есөн улс дэмжсэн талаар мэдэгдлээ.

Холбоотон орнуудын батлан хамгаалах чадавх болон зэвсгийн үйлдвэрлэлийг нэмэгдүүлэх зорилготой уг олон улсын санхүүгийн байгууллагын төв байр Канад улсад байрлахаар болсон бөгөөд үйл ажиллагаагаа 2027 оноос эхлүүлэхээр төлөвлөж байна.

Шинээр байгуулагдаж буй банкийг үүсгэн байгуулахад Канад, Албани, Бельги, Грек, Lатви, Люксембург, Румын, Турк болон Украин зэрэг есөн улс нэгдээд байна. Одоогоор "Их 7"-ийн бүлгээс зөвхөн Канад улс багтаж байгаа ч бусад орнуудад үүд хаалга нь нээлттэй гэдгийг Канадын Гадаад хэргийн сайд Анита Ананд онцолсон юм. Цаашид банкны үйл ажиллагаа жигдрэх үед гишүүн орнуудын тоог 40 хүртэл нэмэгдүүлэхээр төлөвлөж байна.

Орос, Украины дайн үргэлжилж байгаа нь холбоотон орнуудын батлан хамгаалах салбарын үйлдвэрлэлийг яаралтай өргөжүүлэх шаардлагатайг харуулсан бөгөөд энэ нь шинэ бүтцийг бий болгох гол хөдөлгөгч хүч болжээ. Шинэ банк нь уламжлалт зэвсэгт хүчнээс гадна НАТО-гийн гишүүн орнуудын нийлүүлэлтийн сүлжээний дэд бүтцийг бэхжүүлэхэд анхаарна. Ялангуяа арилжааны банкуудаас санхүүжилт авахад хүндрэлтэй байдаг жижиг, дунд үйлдвэрүүдэд хөрөнгө оруулалтын дэмжлэг үзүүлэх юм.

Санхүүжилтийн загварын хувьд Дэлхийн банк групптэй ижил бүтэцтэй байх бөгөөд улсын төсвийн дэмжлэгийг хувийн хөрөнгөтэй хослуулах замаар эрсдэл өндөртэй томоохон төслүүдийг санхүүжүүлнэ. Тус банк урт хугацааны, хөнгөлөлттэй зээл олгох зорилгоор 100 тэрбум фунт стерлинг буюу ойролцоогоор 134 тэрбум ам.долларын санхүүжилт босгохоор зорьж байна.

Төслийн хүрээнд батлан хамгаалах, санхүү, олон улсын харилцаа болон судалгааны салбарт 3,500 хүртэлх шинэ ажлын байр бий болох урьдчилсан тооцоо гарчээ. 

Эх сурвалж:

• dentons.com

• cnbc.mn

• isee.mn

•