АНУ-д 41 жилийн өмнө гарсан хүн амины хэргийн сэжигтнийг ДНХ-ийн шинжилгээгээр илрүүлжээ
АНУ-ын Огайо мужийн Мидлтаун хотод 41 жилийн өмнө гарсан хүн амины ноцтой хэргийг хууль хяналтынхан орчин үеийн технологийн тусламжтайгаар илрүүлж, сэжигтнийг баривчлан яллах дүгнэлт үйлджээ.
Одоогоос 40 гаруй жилийн өмнө буюу 1985 оны аравдугаар сарын 16-ны өдөр зочид буудлын өрөөндөө бусдын гарт амиа алдсан Жон Уоррены хэргийн сэжигтнээр Рэнди Макаллистер гэгчийг тогтоон, долоодугаар сарын 1-нд албан ёсоор яллажээ. Өдгөө 62 настай сэжигтнийг хохирогчийн хулгайлагдсан эд зүйлс дээр үлдсэн биологийн ул мөр, ДНХ-ийн нарийвчилсан шинжилгээний үр дүнд олж тогтоосон байна.
Хэргийн хохирогч, авто сэлбэгийн худалдааны төлөөлөгчөөр ажилладаг байсан 44 настай Жон Уоррен нь бизнесийн гэрээ байгуулахаар Мидлтаун хотод ирээд байхдаа буудлын өрөөндөө харамсалтайгаар амиа алдсан юм. Хэрэг гарсны дараа хохирогчийн хувийн эд зүйлс болон түүний унаж явсан шинэ "Oldsmobile" загварын автомашин алга болсон байжээ. Хэд хоногийн дараа хэргийн газраас 640 орчим километрийн зайд орших Жоржиа мужийн Далтон хотын нэгэн рестораны хогийн савнаас хохирогчийн зарим эд зүйлс олдсон бөгөөд автомашиныг нь хожим Флорида мужаас олж илрүүлсэн байна.
Хэрэг гарах үед цагдаагийн байгууллага Өмнөд Каролина мужийн гурван оршин суугчийг сэжиглэн шалгаж байсан боловч тэдний холбогдолтой болох нь нотлогдоогүй тул хэрэг мухардалд оржээ. Ийнхүү олон жилийн турш архивт хадгалагдаж байсан хэргийг 2019 онд дахин сэргээн шалгаж эхэлсэн байна.
Мөрдөгчид хэргийн газраас болон олдсон эд зүйлсээс цуглуулсан биологийн материалыг орчин үеийн ДНХ-ийн технологи ашиглан шинжилснээр Колумбус хотын оршин суугч Рэнди Макаллистерын мөрийг олж тогтоожээ.
Хэрэгт сэжиглэгдэж буй Рэнди Макаллистер нь өмнө нь хүнд гэмт хэргээр гурван удаа ял шийтгүүлж байсан нэгэн бөгөөд одоогоор өөрийн гэм бурууг хүлээхээс татгалзаж байгаа аж. Мөрдөн байцаагчдын таамаглаж байгаагаар тэрбээр уг хэргийг ганцаараа биш, хамсаатантай үйлдсэн байх магадлалтай бөгөөд тэрхүү хамсаатан нь өдгөө хэдийнэ нас барсан гэж үзэж байна. Шүүхээс түүнийг батлан даалтад гаргахгүйгээр бүх насаар нь хорих ял оноох хэмжээний хүнд хэрэгт буруутган шалгаж эхэлжээ.
Уг хэрэг нь шинжлэх ухаан, технологийн хөгжил, тэр дундаа ДНХ-ийн шинжилгээний дэвшил нь хэчнээн олон жилийн өмнө хаагдсан хэргийг ч илрүүлж, шударга ёсыг тогтооход шийдвэрлэх үүрэг гүйцэтгэж чаддагийг харуулсан тод жишээ болж байна. Хууль хяналтынхан хуучин хэргүүдийг орчин үеийн аргаар дахин шалгах ажиллагааг үргэлжлүүлж байгаа бөгөөд энэ нь гэмт хэрэгтнүүд хэзээ нэгэн цагт ял шийтгэлээс мултарч чадахгүй гэдгийг сануулж байгаа юм.
Эх сурвалж:
• dzen.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.