ОХУ энэ сарыг дуустал дизель түлш экспортлохыг хориглов

ОХУ-ын Ерөнхийлөгч Владимир Путин 2026 оны долоодугаар сарын 8-ны өдөр Засгийн газрын гишүүдтэй шуурхай хуралдаан хийж, тус улсын дотоодын түлш, тээврийн салбарт үүсээд буй хямралт нөхцөл байдлыг яаралтай шийдвэрлэхийг үүрэг болгожээ.

Тус улсын Крым болон Севастополь хотод шатахууны үнэ огцом өсөж, хомстол үүссэн тул Ерөнхийлөгч Путин Шадар сайд Александр Новакт хандан асуудлыг судалж, цаг алдалгүй шийдвэр гаргахыг хатуу шаардаж, Ерөнхий сайд Михаил Мишустинд дотоодын түлшний зах зээлийн нөхцөл байдлын талаар өдөр бүр илтгэж байхыг даалгажээ.

Севастополь хотын захирагч Михаил Развожаевын мэдээлснээр, тус бүс нутагт хамгийн эрэлттэй байдаг АИ-95 маркийн бензиний үнэ нэг литр нь 197 рубльд хүрч, хэвийн хэмжээнээс хоёр дахин өссөн байна. Хөрш зэргэлдээ Краснодарын хязгаарт уг шатахуун 73.5 рублийн үнэтэй байгаатай харьцуулахад энэ нь маш өндөр үзүүлэлт юм. Одоогоор Севастополь хот өдөр тутмын шатахууны хэрэгцээнийхээ дөнгөж гуравны нэгийг хүлээн авч байгаа бөгөөд орон нутгийн эрх баригчид нийтийн үйлчилгээний салбаруудыг түлшээр тэргүүн ээлжинд хангаж, илүүдэл нөөц бүрдсэн тохиолдолд л иргэдэд худалдаалж байна. Энэхүү хямрал нь зургадугаар сарын сүүлээс эхлэн тогтоосон онцгой дэглэм, логистикийн саатал, биржээс шатахуун худалдан авахад тулгарч буй хүндрэлүүд болон тээврийн дэд бүтэц рүү чиглэсэн цохилтуудаас үүдэлтэй ажээ.

Крымын Бүгд Найрамдах Улсын тэргүүн Сергей Аксенов жижиглэнгийн шатахуун түгээх станцуудын үнийг тогтворжуулахын тулд нэг литр тутамд 85 рублийн татаас шаардлагатай байгааг уулзалтын үеэр илэрхийлэв. Шадар сайд Александр Новак уг татаасыг "судлахад бэлэн" байгаагаа хэлэхэд Ерөнхийлөгч Путин түүний үгийг шууд засаж, "судлах бус, хамгийн богино хугацаанд судалж шийдвэр гаргах" хэрэгтэйг сануулжээ. Төр засагт үүнийг шийдвэрлэх хангалттай нөөц бололцоо байгаа тул цаг алдах эрхгүйг тэрээр онцолсон байна.

Түүнчлэн Путин үүсээд буй хүндрэлийг түр зуурын шинжтэй гэж тодорхойлоод, Украины зүгээс аялал жуулчлалын улирлыг тасалдуулах, иргэдийг сандаргах зорилгоор цохилт өгч байгааг буруутгаж, Оросын эрчим хүчний систем аюулгүй байдлын өндөр нөөцтэйг мэдэгджээ.

Дотоодын зах зээлийг тогтворжуулахын тулд ОХУ-ын Засгийн газраас хэд хэдэн яаралтай арга хэмжээг авч хэрэгжүүлэхээр шийдвэрлэжээ. Үүний хүрээнд 2026 оны долоодугаар сарын 8-наас долоодугаар сарын 31-ний өдрийг хүртэл дизель түлш, усан онгоцны түлш болон бусад хийн тосны экспортод бүрэн хориг тавьжээ. Энэхүү шийдвэр нь дотоодын зах зээлд шатахууны нийлүүлэлтийг нэмэгдүүлэх зорилготой бөгөөд өмнө нь хэрэгжиж байсан бензин болон агаарын тээврийн түлшний экспортын хязгаарлалтыг өргөжүүлж буй хэрэг юм. Мөн ОХУ дотоодын хэрэгцээгээ хангахын тулд долоодугаар сараас эхлэн газрын тосны бүтээгдэхүүн импортолж эхлэх бөгөөд үүнийг хөнгөвчлөх үүднээс импортын татварыг тэглэх хугацааг дахин нэг жилээр сунгаж, Оросын төмөр замтай хөнгөлөлттэй тээврийн тарифыг тохиролцсон байна.