"Цайны зам" олон улсын аялал жуулчлалын брэнд болно

Хөх хотод болсон аялал жуулчлалын сайд нарын 10 дахь удаагийн уулзалтаар түүхэн "Цайны зам"-ыг олон улсын аялал жуулчлалын томоохон брэнд болгон хөгжүүлэх хамтарсан хүчин чармайлтыг эрчимжүүлэхээр боллоо. 

БНХАУ-ын Хөх хотод долоодугаар сарын 1-нээс 3-ны өдрүүдэд зохион байгуулагдсан уулзалтад гурван талын салбарын сайд нар оролцож, хамтарсан маркетингийн аян өрнүүлэх, хил дамнасан аялал жуулчлалыг дэмжих шийдвэр гаргажээ. Уулзалтад Монол улсын Соёл, спорт, аялал жуулчлал, залуучуудын сайд Ж.Алдаржавхлан, БНХАУ-ын Соёл, аялал жуулчлалын сайд Сунь Ели, ОХУ-ын Эдийн засгийн хөгжлийн дэд сайд Д.С.Вахруков нар оролцлоо.

Хамтын ажиллагааны хүрээнд зургадугаар сарын 20-30-ны өдрүүдэд "Цайны зам-2026" найрамдалт авто ралли аяллыг амжилттай зохион байгуулжээ. Уг аялалд гурван орны 75 гаруй оролцогч 30 тээврийн хэрэгсэлтэйгээр оролцож, 3400 гаруй километр замыг туулсан байна. Авто ралли БНХАУ-ын Эрээн хотоос эхэлж, түүхэн замын дагуух зургаан аймгийн нутгийг дайран өнгөрч, ОХУ-ын Улаан-Үд хотод барианд оржээ. Түүнчлэн долоо, наймдугаар сард Бээжин болон Мөрөн хотуудын хооронд шууд нислэг үйлдэх бэлтгэл ажил бүрэн хангагдсан байна.

Түүхэн замын аялал жуулчлалын холбооны үйл ажиллагаа өргөжиж, Төв болон Дархан-Уул аймгууд тус холбооны албан ёсны гишүүнээр элсэж, батламжаа гардан авлаа. Үүнээс гадна аялал жуулчлалын улирлын хамаарлыг бууруулах зорилгоор өвлийн спортын бүтээгдэхүүнүүд, тэр дундаа ОХУ-ын багуудтай хийх хоккейн нөхөрсөг тоглолтуудыг зохион байгуулахаар төлөвлөж байна. 

Хамтран ажиллаж буй хөрш орнууд нь тус улсын аялал жуулчлалын хамгийн том зах зээлийг бүрдүүлдэг. Өмнөх 2025 онд тус улс нийт 847 мянга гаруй гадаадын жуулчин хүлээн авснаас БНХАУ-аас 242 мянга, ОХУ-аас 230 мянган жуулчин ирсэн нь хамгийн өндөр үзүүлэлт болжээ. Мөн гадагш чиглэсэн аяллын хувьд тус улсын 1.575 сая иргэн БНХАУ-д, 270.6 мянган иргэн ОХУ-д зорчсон байна. Эдгээр тоон үзүүлэлтүүд нь түүхэн замын брэндийг хөгжүүлэх асар их нөөц боломж байгааг илтгэж байгаа бөгөөд цаашид бүс нутгийн эдийн засгийн хамтын ажиллагааг шинэ шатанд гаргах ач холбогдолтой юм.

Эх сурвалж:

• mnb.mn

• mnb.mn

• vstime.mn

• mocsty.gov.mn

• cnbc.mn