Дээд шүүх 16 настай охины амь насыг хохироосон хэргийг хэлэлцэнэ

Улсын Дээд Шүүхийн Эрүүгийн хэргийн танхимын нийт шүүгчдийн хуралдаанаар олон нийтийн анхаарлын төвд байгаа 16 настай охины амь насыг хохироосон хэргийг хяналтын шатны шүүх хуралдаанаар хэлэлцүүлэхээр шийдвэрлэжээ. Энэхүү шийдвэрийг өнөөдөр гаргасан бөгөөд хохирогчийн ар гэр болон өмгөөлөгчдөөс гаргасан гомдлыг үндэслэн хэргийг дахин нягтлахаар болсон байна.

Тус хэрэг нь 2024 оны зургаадугаар сарын 20-ноос 21-нд шилжих шөнө Хан-Уул дүүргийн 2 дугаар хорооны нутаг дэвсгэрт гарсан байдаг. Хэргийн улмаас 16 болон 32 настай хоёр эмэгтэй онц хэрцгийгээр амиа алдсан бөгөөд хэрэгт Ц.Давгадорж, Э.Ган-Эрдэнэ, Э.Номин-Эрдэнэ, Х.Энхсайхан нарыг холбогдуулан шалгаж эхэлсэн юм.

Анхан шатны шүүхээс 2026 оны нэгдүгээр сарын 23-ны өдөр шүүгдэгч Ц.Давгадоржийг гэм буруутайд тооцон бүх насаар нь хорих ял оноож, 256 сая төгрөгийн хохирол нөхөн төлүүлэхээр шийдвэрлэсэн байна. Харин хэргийн газар хамт байсан Э.Номин-Эрдэнэ, Э.Ган-Эрдэнэ болон насанд хүрээгүй шүүгдэгч Х.Энхсайхан нарт холбогдох хэргийг хэрэгсэхгүй болгож, тэднийг цагаатгасан. Үүний дараа Нийслэлийн Эрүүгийн хэргийн давж заалдах шатны шүүх 2026 оны тавдугаар сарын 11-ний өдөр анхан шатны шүүхийн шийдвэрийг хэвээр үлдээж шийдвэрлэсэн юм.

Хохирогч талынхан буюу талийгаач охины хууль ёсны төлөөлөгч Г.Отгонтуяа болон түүний өмгөөлөгч Б.Солонго, М.Баасанбат, Р.Булгамаа, Б.Баатарсайхан, З.Хүрэлсүх нар шүүхийн шийдвэрийг эс зөвшөөрч Дээд шүүхэд гомдол гаргаад байсан юм. Тэд хэргийн газарт хамт байсан бусад холбогдогчид ч мөн адил хуулийн хариуцлага хүлээх ёстой гэж үзсэн байна.

Дээд шүүх гомдлыг хянан хэлэлцээд, Эрүүгийн хэрэг хянан шийдвэрлэх тухай хуулийн 40.1 дүгээр зүйлийн 1.1-д заасан хууль хэрэглээний зөрүүг арилгах, мөн зүйлийн 1.2-т заасан хуулийг ноцтой зөрчсөн нь шүүхийн шийдвэрт нөлөөлсөн гэх үндэслэлүүдэд хамаарч байна гэж үзжээ. Ийнхүү хэргийг хяналтын шатны шүүх хуралдаанаар эцэслэн дэнслэхээр болж байна.