17 настайдаа найз залуугаа хөнөөсөн бүсгүйн давж заалдах хүсэлтийг хэрэгсэхгүй болгожээ

АНУ-ын Охайо мужийн Дээд шүүхээс найз залуу болон түүний найзын амь насыг автомашины ослоор санаатайгаар хөнөөсөн хэрэгт буруутгагдан бүх насаараа хоригдох ял сонссон Маккензи Шириллагийн давж заалдах гомдлыг зургаадугаар сарын 23-нд хэлэлцэхээс татгалзжээ.  

Аймшигт осол 2022 оны долдугаар сарын 31-ний өдөр Охайо мужийн Стронгсвилл хотод гарсан юм. Хэрэг гарах үед 17 настай байсан Маккензи Ширилла өөрийн жолоодож явсан автомашинаа зориуд цагт 160 километр хүртэл хурдлуулан, тоосгон барилга мөргөжээ. Ослын улмаас түүний найз залуу, 20 настай Доминик Руссо болон түүний найз 19 настай Дэвион Фланаган нар газар дээрээ амиа алдсан. Прокурорууд үүнийг "үхлийн даалгавар" гэж тодорхойлсон бөгөөд Ширилла найз залуутайгаа харилцаагаа таслахыг хүсээгүйн улмаас хамт үхэхээр шийдэж, ийм үйлдэл хийсэн болохыг тогтоож байсан юм. 

Шүүхээс 2023 онд Шириллаг санаатайгаар хүний амь хөнөөсөн 12 зүйл ангиар буруутай гэж үзэж, 15 жилээс бүх насаар нь хорих ял оноосон юм. Шүүх хурлын явцад өмгөөлөгчид түүнийг зүрхний цохилт түргэсэх хам шинж буюу "POTS" өвчний улмаас жолооны ард ухаан алдсанаас осол гарсан гэж хамгаалж байв. Гэвч шүүгч ослын өмнөх хяналтын камерын бичлэгүүд болон түүний үйлдлүүдийг шинжлэн судалсны үндсэн дээр уг хамгаалалтыг няцааж, хэргийг бүрэн санаатай үйлдэл гэж дүгнэсэн байна.

Олныг цочирдуулсан хэргийн талаарх мэдээлэл саяхан Netflix платформ дээр "The Crash" нэртэй баримтат кино болон гарснаар олон нийтийн анхаарлыг дахин татсан юм. Кинонд Ширилла шоронгоос анх удаа ярилцлага өгөхдөө өөрийгөө алуурчин биш, харин эмгэнэлт явдлын золиос хэмээн тайлбарласан байна. Одоогийн байдлаар Маккензи Ширилла Огайо мужийн эмэгтэйчүүдийн хорих ангид ялаа эдэлж байгаа бөгөөд хууль эрх зүйн бүх боломжууд нь хаагдсанаар түүний ял хэвээр үлдэж байна.