Норвегийн эргээс 18-р зууны хятад шаазан ачсан хөлөг онгоцны сэг олдов
Норвегийн Үндэсний өвийн яам болон Далайн музейгээс тус улсын өмнөд эргийн Скагерракийн хоолойд 18-р зууны үед хамаарах дарвуулт хөлөг онгоцны сэг олдсон талаар өнөөдөр мэдэгдлээ.
"Шаазангийн хөлөг" хэмээн нэрлэгдээд буй уг олдвор нь 1700-аад оны дунд үед живсэн гэж таамаглаж байгаа бөгөөд Хойд Европт урьд өмнө олдож байгаагүй хамгийн сайн хадгалагдсан хятад шаазан эдлэлийн ачааг тээвэрлэж явснаараа онцгой ач холбогдолтой юм.
Уг түүхэн олдворыг "Saastad Ur" цагны дэлгүүрийн эзэн, алсын удирдлагатай усан доорх төхөөрөмж (ROV) ашиглан хайгуул хийдэг Эспен Саастад анх илрүүлжээ. Тэрээр олдворын цар хүрээг ойлгомогцоо холбогдох эрх баригчдад яаралтай мэдэгдсэн байна. Хөлөг онгоцны сэг нь Норвеги, Швед, Дани улсуудын дунд орших Хойд тэнгис болон Каттегатын тэнгисийг холбодог Скагерракийн хоолойн 600 орчим метрийн гүнд, далайн ёроолд байрлаж байна.
Олдворын хамгийн гайхалтай хэсэг нь нягт өрж байрлуулсан хөх, цагаан өнгийн хятад шаазан аяганууд юм. Үүнээс гадна археологчид Европт үйлдвэрлэсэн хундага, нэхмэл эдлэл, үр тариа болон Англи, эсвэл Герман загварын лааны суурийн хэлтэрхий зэрэг эд зүйлсийг гаргаж авсан байна. Далайн гүний хэт их даралттай нөхцөлд ажиллахын тулд судлаачид робот гар, соруулах төхөөрөмж, нарийн камерын системээр тоноглогдсон дэвшилтэт алсын удирдлагатай төхөөрөмжүүдийг ашиглан хэврэг олдворуудыг аюулгүйгээр гаргаж авчээ.
Засгийн газар болон музейн удирдлагууд шинэ нээлтийн түүхэн болон шинжлэх ухааны үнэ цэнийг өндрөөр үнэлж байна.
Уур амьсгал, байгаль орчны сайд Андреас Бьелланд Эриксен "Энэ бол зөвхөн онцгой олдвор төдийгүй шинжлэх ухааны асар их ач холбогдолтой бөгөөд усан доорх археологийн салбарт технологийн чухал дэвшил гарсныг батлан харууллаа" хэмээн онцолжээ. Мөн Үндэсний эртний эдлэлийн газрын комиссар Ханна Гейран олдворын цар хүрээг хараад нүдэндээ ч итгээгүйгээ илэрхийлж, үнэхээр итгэмээргүй үйл явдал болсныг дурдсан байна.
Судлаачид хөлөг онгоцыг 18-р зууны дунд үед живсэн гэж тогтоосон хэдий ч хаанаас хөдөлсөн, аль боомтыг зорьж явсан зэрэг нь одоогоор тодорхойгүй байна. Осло хот дахь Далайн музей бүрэн хэмжээний малтлага хийхээс өмнө урьдчилсан судалгааны ажлыг үргэлжлүүлж байгаа юм. Далайн гүнээс гаргаж авсан шаазан болон бусад олдворуудын зарим хэсгийг нарийвчилсан шинжилгээнд оруулахаас өмнө олон нийтэд зориулан музейд дэлгэн үзүүлэхээр төлөвлөж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.