Мэрилин Монрогийн нас барахаасаа хэдхэн хоногийн өмнө авахуулсан ховор зургуудыг дэлгэв
Холливудын нэрт од Мэрилин Монрогийн мэндэлсний 100 жилийн ойг дэлхий даяар өргөнөөр тэмдэглэж байна.
Энэхүү түүхэн үйл явдалд зориулан Лондон болон Лос-Анжелес хотуудад томоохон үзэсгэлэнгүүд нээгдэж, шинэ ном хэвлэгдэн гарсан бөгөөд түүний амьдралын сүүлийн өдрүүдэд авахуулсан гэрэл зургууд болон урлагт оруулсан хувь нэмрийг нь онцолсон арга хэмжээнүүд болж байна.
Их Британийн "BBC" агентлагийн сэтгүүлч Арва Хайдер ойд зориулсан нийтлэлдээ "Алдарт жүжигчний сүүлчийн гэрэл зургуудыг харах нь маш сэтгэл хөдөлгөм байдаг"-ийг онцгойлон тэмдэглэсэн байна. Үүнтэй зэрэгцэн Лондон хотын Үндэсний хөрөг зургийн галерейд "Мэрилин Монро: Хөрөг" нэртэй шинэ үзэсгэлэн нээгдлээ.
Тус үзэсгэлэнгийн кураторын тайлбарласнаар, Монро нь зөвхөн зурагчны дуранд идэвхгүй өртөгч байсангүй, харин өөрийн дүр төрхийг бүтээх "идэвхтэй бүтээгч" байсан бөгөөд зураг авалтыг удирдан чиглүүлж, таалагдаагүй зургуудаа хасуулах эрхээ бүрэн эдэлдэг байсан хэмээн өгүүлжээ.
Ойн хүрээнд зохион байгуулагдаж буй арга хэмжээнүүд нь 1962 онд хийгдсэн түүхэн зураг авалтуудад гол анхаарлаа хандуулж байна.
Тухайлбал, гэрэл зурагчин Жорж Баррис түүнийг нас барахаас сар хүрэхгүй хугацааны өмнө буюу 1962 оны долдугаар сарын 13-нд Санта Моникагийн далайн эрэг дээр дурандаа буулгажээ. Монро эдгээр зургуудынхаа талаар "Энэ бол яг л би... жинхэнэ би байна" хэмээн дурссан байдаг аж.
Мөн, "Vogue" сэтгүүлд зориулан Берт Стерний авсан "Сүүлчийн суулт" хэмээх гурван өдрийн зураг авалтын 2500 ширхэг эх хальсыг "Heritage Auctions" дуудлага худалдааны төвөөс саяхан олон нийтэд дэлгэсэн юм. Түүнчлэн түүний үед амьд сэрүүн буй цорын ганц гэрэл зурагчин Лоуренс Шиллер "Something's Got to Give" киноны зураг авалтын үеэр усан санд нүцгэн үсэрч, карьераа өөрийн гарт авахыг оролдсон түүний зоримог үйлдлийг эргэн дурссан байна.
Зуун жилийн ойд зориулан "Мэрилин Монро 100" ном хэвлэгдэн гарсан нь бас нэгэн онцлох үйл явдал боллоо.
Уг бүтээлд Милтон Грин, Ив Арнольд, Анри Картье-Брессон зэрэг 17 шилдэг гэрэл зурагчны бүтээлүүд багтсан бөгөөд Мэрилин Монрогийн эрч хүчтэй, баяр баясгалантай, өөртөө итгэлтэй, олны шүтээн байсныг харуулжээ. Үүний зэрэгцээ Лос-Анжелес хотын Кино урлагийн академийн музейд София Серраногийн дэглэсэн "Мэрилин Монро: Холливудын шүтээн" үзэсгэлэн гарч эхэлсэн бөгөөд энэ нь 1950-иад оны студийн тогтолцоонд уран бүтээлийн эрх чөлөөгөө олж авахын төлөөх түүний тэмцлийг харуулсан байна.
Алдарт жүжигчний амьдралын сүүлийн өдрүүдийн гэрэл зургуудыг 1962 оны наймдугаар сард тохиосон эмгэнэлт үхэлтэй нь холбон тайлбарлах хандлага түгээмэл байдаг. Гэвч 100 насны ойн хүрээнд гарч буй эдгээр үзэсгэлэн, бүтээлүүд нь түүний мэргэжлийн өндөр ур чадвар, гэрэл зурагчид болон камерыг ашиглан олон нийттэй холбогдох онцгой чадварыг нь алдаршуулж, түүхэнд үлдээсэн өв нь мөнхөд оршихыг дахин баталж байгаа юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.