120 жилийн өмнө шатсан гэж үзэж байсан ном "гарч иржээ"
АНУ-ын Сан Франциско хотын "Mechanics' Institute" номын санд нэгэн гайхалтай үйл явдал тохиолдлоо.
1906 оны аймшигт газар хөдлөлт болон түймрийн үеэр бүрмөсөн устсан, нэг ч хувь үлдээгүй гэж тооцогдож байсан Брет Хартын "Echoes of the Foot-Hills" яруу найргийн түүвэр 120 орчим жилийн дараа эх газартаа "эргэн иржээ". Энэхүү ховор олдвор нь тус номын сангийн түүхэн дэх хамгийн чухал үйл явдлуудын нэг болж байна.
1906 оны дөрөвдүгээр сарын 18-нд болсон хүчтэй газар хөдлөлт нь хотын 80 орчим хувийг сүйтгэсэн түүхтэй. Энэхүү байгалийн гамшгийн үеэр тус номын сангийн барилга бүрэн сүйрч, 200 гаруй мянган боть ном бүхий асар том хөмрөг үнс нурам болсон юм. Зуу гаруй жилийн турш дээрх яруу найргийн түүврийг тэрхүү гамшигт өртөн шатсан хэмээн судлаачид болон номын санчид үзэж байсан аж.
Гэвч хуучны эд зүйл цуглуулагч нэгэн уг номыг интернэтийн хуучин ном худалдаалах цахим хуудаснаас ердөө 35 ам.доллароор худалдан авснаар түүхэн үнэнийг илрүүлжээ. Номын хавтсан дээр 1874 онд тус номын сангийн өмч байсныг гэрчлэх тамга дарагдсан байсан нь түүний анхаарлыг шууд татсан байна. Хэдийгээр номын гадна тал галд өртөж хөө тортог болсон шинжтэй байсан ч доторх хуудаснууд нь уншигдахуйц, сайн хадгалагдан үлджээ.
Мэргэжилтнүүдийн таамаглаж буйгаар, уг ном газар хөдлөлт болох үед номын санд бус, харин уншигчийн гарт байсан тул ийнхүү аврагдсан бололтой. Тухайн үед уншигч уг номыг гэр рүүгээ авч явсан байх магадлалтайг харуулж байгаа бөгөөд гамшгийн дараа буцааж өгөх боломжгүй нөхцөл байдал үүссэн байж болзошгүй юм.
Өдгөө 1910 онд дахин сэргээн босгосон тус номын сан уг бүтээлийг албан ёсоор хүлээн авч, үнэлж баршгүй түүхэн өв хэмээн зарлалаа.
Одоогийн байдлаар уг номыг номын сангийн байранд дэлгэн тавьж олонд үзүүлж байгаа бөгөөд 120 гаруй жилийн өмнө устсан асар том хөмрөгтэй холбох цор ганц бодит гүүр болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.