Хөдөлмөр, нийгмийн түншлэлийн гурван талт хэлэлцээр зохион байгуулна

“Хөдөлмөр, нийгмийн түншлэлийн гурван талт 2026-2028 оны Улсын хэлэлцээр”-ийг ойрын хугацаанд байгуулахаар талууд санал нэгдлээ.

Засгийн газрын 2026 оны тавдугаар сарын 6-ны өдрийн хуралдааны тэмдэглэлээр уг хэлэлцээрийг байгуулах ажлыг эрчимжүүлэх үүргийг Гэр бүл, хөдөлмөр, нийгмийн хамгааллын сайд Т.Аубакир-т өгсөн байна. Үүнд Эдийн засаг, хөгжлийн яам, Сангийн яам, Боловсролын яам, Эрүүл мэндийн яам, Аж үйлдвэр, эрдэс баялгийн яамны төлөөлөл оролцож байгаа юм.

Улсын хэлэлцээрийн төсөлд Монголын үйлдвэрчний эвлэлийн холбооноос 52, ажил олгогчдын байгууллагаас 30, яамдаас 27 санал ирүүлж, нийт 109 саналыг ажлын хэсэг нэгтгэн боловсруулжээ.

Ингэснээр хэлэлцээрийг эхлүүлэх бэлтгэл бүрэн хангагдаж хэлэлцээр нь Засгийн газрын 2024-2028 оны үйл ажиллагааны хөтөлбөртэй уялдсан бөгөөд хөдөлмөр эрхлэлтийг дэмжих, хөдөлмөрлөх эрх болон нийгмийн хамгааллын баталгааг сайжруулах, цалин орлогыг нэмэгдүүлэх, нийгмийн түншлэл, тэгш байдлыг бэхжүүлэхэд чиглэж буйгаар онцлог юм.

Өнөөдөр болсон гурван талт хамтарсан уулзалтаар хэлэлцээр байгуулах бүрэлдэхүүн, тов хугацаа болон онцгойлон анхаарах асуудлуудыг хэлэлцжээ. Мөн Хөдөлмөр, нийгмийн түншлэлийн гурван талт Үндэсний хорооны 2026 оны хоёрдугаар тогтоолоор байгуулагдсан ажлын хэсэг хэлэлцээрийн төслийг эцэслэн боловсруулж, байгуулахад бэлэн болсон тул ойрын хугацаанд “Гурван талт улсын хэлэлцээр”-ийг байгуулахаар талууд санал нэгджээ.