Шатахууны хомстолын улмаас Европын томоохон авиа компани олон мянган нислэгээ цуцаллаа
Европын хамгийн том агаарын тээврийн компани болох Германы "Люфтганза" (Lufthansa) нисэхийн түлшний ноцтой хомстолын улмаас таваас аравдугаар сарын хооронд хийгдэх 20,000 орчим богино зайн нислэгээ цуцлах шийдвэр гаргалаа.
Уг гэнэтийн арга хэмжээ нь Ойрхи Дорнодод хурцадсан зэвсэгт мөргөлдөөний улмаас дэлхийн газрын тосны нийлүүлэлт тасалдаж, шатахууны үнэ огцом өссөнтэй шууд холбоотой юм.
Тус компани Франкфурт болон Мюнхен дэх үндсэн зангилаа нисэх буудлуудаасаа өдөр бүр үйлдэгддэг ашиггүй 120 нислэгийг зогсоож байна. Мөн бүс нутгийн нислэг үйлддэг "Lufthansa CityLine" охин компанийн түлшний зарцуулалт өндөртэй 27 ширхэг "Canadair CRJ" хуучин онгоцыг ашиглалтаас гаргажээ. Ингэснээр 40,000 тонн нисэхийн түлш хэмнэх тооцоо гарсан бөгөөд энэ нь группийн нийт зорчигч тээврийн хүчин чадлын ердөө нэг хувийг эзэлж байгаа аж.
Хямралын гол шалтгаан нь хоёрдугаар сарын сүүлээр АНУ, Израил болон Иран улсуудын хооронд эхэлсэн цэргийн ажиллагаа юм. Мөргөлдөөний улмаас дэлхийн газрын тосны худалдааны 20 хувь дамжин өнгөрдөг Ормузын хоолой хаагдаж, онгоцны түлшний үнэ хоёр дахин нэмэгдсэн байна.
Түлшний ноцтой дутагдал зөвхөн Германы компаниар хязгаарлагдахгүй дэлхийн нисэхийн салбарыг бүхэлд нь хамарч эхэллээ. Олон Улсын Эрчим Хүчний Агентлагийн (IEA) гүйцэтгэх захирал Фатих Бирол Европ тивд ердөө зургаан долоо хоногийн нисэхийн түлшний нөөц үлдсэнийг анхааруулж, үүнийг "бидний нүүр тулж байсан хамгийн том эрчим хүчний хямрал" хэмээн тодорхойлсон байна.
Нөхцөл байдалтай уялдуулан Скандинавын "SAS" компани дөрөвдүгээр сард 1,000 нислэгээ цуцалсан бол, Нидерландын "KLM" Схипхол нисэх буудлаас үйлдэх 160 нислэгээ зогсоож, АНУ-ын "United Airlines" болон Азийн хэд хэдэн томоохон тээвэрлэгчид нислэгийн хуваарьтаа өөрчлөлт оруулж, таналт хийгээд байна.
Үүсээд буй онцгой нөхцөл байдалтай холбогдуулан Европын Холбооны тээврийн сайд нар энэ долоо хоногт яаралтай хуралдлаа. Европын Тээврийн комиссар Апостолос Цицикостас тус холбоо АНУ-аас өөр төрлийн нисэхийн түлш худалдан авах боломжийг судалж байгааг онцолсон юм. Түүнчлэн агаарын тээврийн компаниуд нислэгийн эрхээ хадгалахын тулд хоосон онгоц нисгэж, үнэт түлш үрэхээс сэргийлэх зорилгоор нисэх буудлын хуваарийн дүрмийг зөөлрүүлэхээр төлөвлөж байгаа нь салбарын тогтвортой байдлыг хадгалах чухал алхам болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.