Мексикийн Теотиуакан пирамидад буудалцаан болж Канадын жуулчин амиа алджээ
Мексикийн нийслэл Мехико хотоос хойд зүгт орших ЮНЕСКО-гийн соёлын өвд бүртгэгдсэн Теотиуакан эртний байгууламжид зэвсэгт халдлага гарч, нэг хүн амиа алдан 13 хүн гэмтэж бэртжээ. Хэрэг явдал Сарны пирамид дээр орон нутгийн цагаар 11:30 цагийн орчимд болсон бөгөөд амь үрэгдсэн хохирогч нь Канадын 32 настай эмэгтэй жуулчин болохыг албаныхан баталгаажуулаад байна.
Халдлагын үеэр нийт 13 орчим хүн янз бүрийн байдлаар бэртэж гэмтсэний зургаа нь суманд өртсөн байна. Шархадсан хүмүүсийн дунд АНУ, Канад, Колумби, Бразил болон Оросын иргэд байгаа юм. Бусад хохирогчдын хувьд гэнэтийн буудалцааны үеэр сандралдан зугтахдаа пирамидын эгц шатнаас унаж бэртсэн бөгөөд тэдний дунд зургаан настай хүүхэд, 61 настай өндөр настан байсан талаар аврах албаныхан мэдээлэв.
Гэмт хэргийг Мексикийн иргэн, 27 настай Хулио Сесар Хассо Рамирес гэгч үйлдсэн болохыг цагдаагийн байгууллагаас тогтоожээ. Тэрээр Сарны пирамидын орой дээрээс доор байсан жуулчид руу чиглүүлэн гал нээсэн бөгөөд хэргийн газарт өөрийгөө буудан амиа хорлосон байна. Цагдаа нар түүний цогцосны дэргэдээс гэмт хэрэгт ашигласан гар буу, хутга болон нэмэлт сум хэрэгслийг олж илрүүлэн эд мөрийн баримтаар хураан авчээ.
Энэхүү ноцтой үйл явдалтай холбогдуулан Мексик улсын Ерөнхийлөгч Клаудиа Шейнбаум хохирогчдын гэр бүлд гүн эмгэнэл илэрхийлж, хэргийг яаралтай, нарийвчлан шалгахыг хууль сахиулах байгууллагуудад үүрэг болголоо. Канадын Гадаад хэргийн сайд Анита Ананд уг халдлагыг "аймшигт хүчирхийлэл" хэмээн буруушааж, хохирогчдын ар гэрийнхэнтэй нягт холбоотой ажиллаж байгаагаа мэдэгдсэн байна.
Одоогоор гэмт этгээдийн халдлага үйлдэх болсон сэдэл тодорхойгүй байгаа бөгөөд мөрдөн шалгах ажиллагаа үргэлжилж байна. Уг хэрэг нь Мексик улс ирэх зургаадугаар сард хөлбөмбөгийн Дэлхийн аварга шалгаруулах тэмцээнийг хамтран зохион байгуулахаар бэлтгэж буй чухал цаг үед тохиож байгаагаараа тус улсын аялал жуулчлал, аюулгүй байдлын салбарт томоохон анхааруулга болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.