Соёлын өвийг завшсан гэм буруутай хэмээн Х.Болдбаатарыг дөрвөн сая төгрөгөөр торгожээ

Ерөнхийлөгч асан Ц.Элбэгдоржийн эхнэрийнх нь төрсөн дүү Х.Болдбаатарт холбогдох, соёлын өвийн эсрэг гэмт хэргийг шүүх хэлэлцэн шийдвэрлэжээ. “Их тэнгэр” цогцолборт байсан бүтээлүүдээс алга болсны нэгийг Х.Болдбаатарын эзэмшлийн галерейгаас олсон гэх мэдээлэл хэдэн жилийн өмнө цацагдаж, олны анхааралд өртөж байв. Түүнийг нь хууль хяналтын байгууллагынхан шалгаж, Сүхбаатар дүүргийн Прокурорын газраас Х.Болдбаатарт холбогдуулан Эрүүгийн хуулийн 25.3-1 дэх хэсэгт заасны дагуу яллах дүгнэлт үйлдэн шүүхэд шилжүүлсэн талаар бид өмнө нь дэлгэрэнгүй мэдээлсэн.

Х.Болдбаатарын үүсгэн байгуулсан “Нью фолдер арт” ХХК-ийн галерейд 2019 онд хууль сахиулах байгууллагынхан үзлэг нэгжлэг хийж, соёлын өвд хамаарах хэд хэдэн зүйлийг хураан авсан аж. Энэ талаар Х.Болдбаатар шүүхэд “Төр миний хувийн складыг үзнэ гэхэд нь үзүүлсэн, бүх зүйлсээ гаргаж харуулсан. Захиалгатай ч юм уу, мэдэхгүй, миний уран зургийн цуглуулгыг л үзэх гэж орж ирээд соёлын өвийг олсон. Миний хувьд тухайн соёлын өвийг зарах, завших үйлдэл нэг ч удаа хийгээгүй. Хадгалж байсан. Уран зургийн хажууд тухайн чулуунуудыг тавихаар сайхан харагддаг” хэмээн мэдүүлжээ. Өөрөөр хэлбэл, Х.Болдбаатарын “Бугуйлч” гэх бүтээл түүний галерейгаас олдсон цаг үед цагдаагийнхан нэгжлэг хийхдээ чулуужсан мод, хадны зургууд, эртний агсарга бүсний чимэглэл зэргийг хадгалж байсныг тогтоосон юм. Хүрлийн үед хамаарах хадны зургууд, Дундад зууны үеийн агсарга бүсний алтадмал хүрэл товруун 25 чимэглэл зэргийг хураан авчээ. Мэргэжлийн шинжээчид эд өлгийн зүйлсийг шинжлээд хадны сүг зургуудыг байгалийн хаднаас хурц үзүүртэй зүйл ашиглан ховхолж авсан гэдгийг тогтоосон аж. Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүх эл хэргийг хэлэлцээд Х.Болдбаатарыг соёлын биет өвд хамаарах хадны зургийн хэсгүүд, агсарга бүсний 25 чимэглэл, үнсэн самбар, 70 см урттай чулуужсан мод зэргийг санаатайгаар соёлын өвийн нэгдсэн санд бүртгүүлэлгүй, археологийн олдворыг төрийн өмчлөлд шилжүүлэлгүйгээр шунахай сэдэлтээр хууль бусаар эзэмшиж, өөрийн хөрөнгийн адил ашиглах боломжийг өөртөө бий болгож Эрүүгийн хуулийн 25.3-1 дэх хэсэгт заасан Соёлын биет өвийг завшсан гэм буруутай гэж дүгнэсэн юм. Улмаар дөрвөн сая төгрөгөөр торгох ял шийтгэж, гурван сарын хугацаанд хэсэгчлэн төлүүлэхээр тогтоов. Харин дээрх олдворуудыг Соёлын өвийн үндэсний төв, ШУА-ийн Палеонтологийн хүрээлэнд шилжүүлэхээр шийдвэрлэжээ.