О.Алтангэрэл: Шүүгч бусдын нөлөөнд орвол "ял шийтгэгдэх" эрүүгийн хуулийн өөрчлөлтийг нэн даруй өргөн барина

Ерөнхийлөгч асан Ц.Элбэгдорж, ЕТГ-ын дарга асан П.Цагаан нарыг Монгол Улсын хууль хяналтын байгууллагаас шалгаж буй. Улмаар  өмгөөлөгчдөөс нь Ц.Элбэгдорж, П.Цагаан нарыг баривчлах тогтоолыг хүчингүй болгуулах хүсэлт гаргасан юм. Үүний дагуу прокуророос шүүхэд таслан сэргийлэх арга хэмжээг цуцлуулах санал хүргүүлсэн байна. Шүүх уг хүсэлтийг өнөөдөр өглөө 09.00 цагаас хэлэлцэж, хүчингүй болгожээ. 

Уг асуудлын талаар Хууль зүй, дотоод хэргийн сайд О.Алтангэрэл:

-2012 онд Ерөнхийлөгч асан Н.Энхбаярыг баривчлах гэж буйг Ц.Нямдорж гуай мэдээгүй гэхэд гайхаж, бас итгээгүй юм. Гэтэл интерполоор эрэн сурвалжилж байсан хүмүүстэй холбоотой шийдвэр шүүхээр хэлэлцэгдэх, баривчлах захирамжийг цуцлахыг нэг өдрийн дотор "түүгээрээ" амжуулж, шийдвэрлэхийг харж итгэлээ.

Авлигачдын талаарх шийдвэр үүн шиг хурдан гардаг бол ч!. Засгийн газар, АТГ-ын шударга ёсны тэмцлийн замд тээглэж буй бул хар чулуу нь шүүх, авлигачдын халхавч нь бусдын утсан хүүхэлдэй бологч шүүгч гэдэг нь тодорхой болж байна. Шүүгч бусдын нөлөөлөлд орвол ял шийтгэгдэх эрүүгийн хуулийн өөрчлөлтийг нэн даруй өргөн барина гэжээ.