УИХ-ын дарга асан З. Энхболд хотын дарга Х.Нямбаатарыг нэр төрд нь халдаж, гүтгэсэн үндэслэлээр гомдол гаргажээ. 

УИХ-ын дарга асан З. Энхболд:

-Хотын дарга Х.Нямбаатар намайг удаа дараа гүтгэлээ. Замын бордюр хагалсан гэж гүтгэсэн. Х.Нямбаатарын бордюр гэж ярих үед миний бие Өвөрхангай аймгийн Уянга суманд мод, зүлэг тариад явж байсан. Өвөрхангайгаас наашаа сунадаг алх байдаггүй юм бол бордюрыг хагалах ямар ч боломжгүй. 

Хоёрдугаарт, гадаадын туршуул гэж гүтгэсэн. Өөрийнх нь хэлсэн хоёр үгээр эрүүгийн хуулийн 13.14 дугаар зүйлийн дагуу шалгаж өгөөч хэмээн Хан-Уул дүүргийн хоёрдугаар хэлтэст хандаж байна. 

Гадаадын аль улсын туршуул гэж байгааг би ойлгоогүй. Эрдэнэс Тавантолгойг хулгайлах гээд байсан Монгол, Хятадын хамтарсан бүлэглэл байгаа. MCS, Ц.Элбэгдорж гэсэн нөхөд 3бид зөндөө олох орлогоо алдлаа3 гэж гомдол ярьдаг. Х.Нямбаатар түүний нэг болчихоод гомдоод байх шиг байна. 100 их наяд төгрөг Хятадын талд очихыг би болон УИХ-ын 40 гишүүн зогсоосон. Тэрний төлөө гадаадын туршуул гэж хэлж байгаа бол цагдаа дээр ирж тайлбараа өг. Би гадаадын туршуул биш. Монголын ард түмэнд Эрдэнэс Тавантолгойг үлдээснээс өөр хийсэн хэрэг байхгүй. 

Би есдүгээр сарын 11-ний өглөө Өвөрхангай аймгийн Уянга сумаас лайв хийж энд явж байна, юу яриад байгаа юм, уучлалт гуй гэсэн. Одоо хүртэл Х.Нямбаатар уучлалт гуйсангүй. Зургаан хоног өнгөрөхөд уучлалт гуйгаагүй учраас цагдаад гомдол гаргаж байна. 

Х.Нямбаатар энд ирж намайг бордюр хагласан гэдгийг батлах ёстой. Мөн гадаадын аль улсын туршуул гэдгийг батлах ёстой. Чадахгүй бол ялаа авна. Ж.Наранцацралт агсан, Э.Бат-Үүл хоёрыг эс тооцвол хэдэн зуун засаг дарга МАН-аас сонгогдож байсан. Гэтэл одоо энэ хотоо хар л даа. Бөөн асуудал. Найман жил засах ёстой байсан замыг сонгуулиас нэг хоёр сарын өмнө зам засаж байгаа юм шиг дүр үзүүлж байна. 

Урьд нь иргэд дарга нарыг шүүмжлээд цагдаагийн хаалга татдаг байсан. Одоо анх удаа том дарга нь иргэнээ гүтгэж байна. Монгол Улсын Үндсэн хуульд Х.Нямбаатар том дарга байна уу, З.Энхболд энгийн иргэн байна уу ялаагүй ижил эрх үүрэгтэй байдаг. Хууль хяналтын байгууллага үнэн зөвөөр нь шийдэж өгнө гэдэгт итгэлтэй байна.

Алхаар цохиход бутарч байгаа замын хашлага чинь угаасаа хуурамч шүү дээ. Хүмүүс олон нийтийн сүлжээнд тавьсан байна лээ. Байгалийн боржин чулуу 120 мянган төгрөгийн үнэтэй байж болно. Х.Нямбаатарын нийлүүлсэн нь 120 мянган төгрөг хүрэхээргүй байсан. Үүнийг шалгах ёстой, гэхдээ шалгах нь миний ажил биш. 

Би татвар төлөгч, Улаанбаатар иргэний хувьд нүхгүй замаар явмаар байна. Тэр бордюр нь ямар байх нь надад хамаагүй. Бордюртэй байсан байгаагүй ялгаагүй, зам нь бүтэн байх ёстой гэв. 

---