Энэ оны эхээр АНУ-ын агаарын орон зайд нэвтэрч, ихээхэн шуугиан тарьсан Хятадын тагнуулын гэх агаарын бөмбөлөг Америкийн цэргийн баазуудаас хэдэн өдрийн турш мэдээлэл цуглуулж, Бээжин рүү шууд дамжуулж чадсан гэж албаны хүмүүс мэдэгджээ.

Гэхдээ уг агаарын бөмбөлөг нь дүрс зураг авахаасаа илүүтэйгээр цахилгаан дохионы мэдээлэл цуглуулсан гэж нэгэн албан тушаалтан хэлснийг "NBC News" агентлаг тэмдэглэсэн байна.

Хэдийгээр Цагаан ордын зүгээс энэхүү мэдээллийг АНУ-ын Батлан хамгаалах яамны хэвлэлийн төлөөлөгч Сабрина Сингх өнгөрөгч даваа гарагт хийсэн мэдэгдэлдээ, Холбооны мөрдөх товчоо агаарын бөмбөлгийн хэлтэрхийг шинжилсээр байгаа ба тус хөлгийг алсаас удирдаж, жолоодож байсныг тогтоосон гэжээ. Тэрээр мөн "Хятад улс ямар мэдээлэл олж авч чадсан талаар хэлэхэд эрт байгаа ч бидний зүгээс авсан урьдчилсан сэргийлэх арга хэмжээнүүд тэдний тагнуулын ажиллагааг ихэд хязгаарласан нь тодорхой байна" хэмээсэн аж.

Ойролцоогоор 60 метрийн өндөртэй уг агаарын бөмбөлгийг АНУ-ын сөнөөгч онгоц өнгөрөгч хоёрдугаар сарын 4-ний өдөр Өмнөд Каролина мужийн эргийн ойролцоо буудаж унагасан билээ. Харин Хятадын албаныхан үүнийг цаг агаарын мэдээлэл цуглуулах зориулалттай иргэний агаарын бөмбөлөг хэмээн тодорхойлж, АНУ хэтэрсэн хариу үйлдэл үзүүллээ хэмээн буруушаасан юм. Улмаар тус үйл явдлын улмаас дипломат маргаан үүсэж, АНУ-ын Төрийн нарийн бичгийн дарга Антони Блинкен БНХАУ-д хийх айлчлалаа цуцлахад хүргэсэн.

Үүнээс гадна, АНУ-ын сөнөөгч онгоцнууд Хятадаас гаралтай гэж сэжиглэсэн өөр хэд хэдэн бөмбөлгийг буудаж унагаад буй. Мөн тус улсын Батлан хамгаалах яамнаас Бээжинг дэлхийн өнцөг булан бүрт тагнуулын агаарын бөмбөлгүүд хөөргөн, мэдээлэл цуглуулж байгаа гэж мэдэгджээ.

Эх сурвалж: BBC

---