В.Зеленский ОХУ-ын дайныг санхүүжүүлэх орлогыг таслан зогсоохыг НҮБ-ын индрээс уриалав
НҮБ-ын Ерөнхий Ассамблейн чуулганд оролцсон Украины Ерөнхийлөгч Володимир Зеленский дэлхийн улс орнуудыг ОХУ-ын дайныг санхүүжүүлэхэд ашиглаж буй орлогын эх үүсвэрийг таслан зогсоохыг уриаллаа.
Тэрбээр ОХУ-ын эдийн засгийн чадамжийг сулруулахгүйгээр цэргийн ажиллагааг зогсоох боломжгүй гэж үзэж байгаагаа илэрхийлж, Москвагийн эсрэг эдийн засгийн дарамтыг нэмэгдүүлэх шаардлагатайг онцолжээ.
В.Зеленский “ОХУ-тай худалдаа хийх нь дайныг үргэлжлүүлэхэд шаардлагатай санхүүжилтийг бий болгож байна” хэмээн мэдэгдээд, тус улстай хийх худалдааг хязгаарлахыг олон улсын хамтын нийгэмлэгт уриалсан байна.
Мөн ОХУ-ын зэвсгийн үйлдвэрлэл болон санхүүгийн урсгалыг хязгаарлах нь дайныг зогсоох гол арга замуудын нэг гэж үзжээ. Түүнчлэн ОХУ худалдаанаас орлого олж байгаа нөхцөлд дипломат яриа хэлэлцээнд бодитой хандах сонирхолгүй байна гэж шүүмжилсэн байна. В.Зеленский Украины тал өвлийн улиралд ОХУ-ын халдлагыг сөрөн зогсохын зэрэгцээ хариу цохилт өгөхөд бэлтгэж байгааг мөн мэдэгдэв.
Харин НҮБ-ын Аюулгүйн Зөвлөлийн хуралдааны үеэр ОХУ-ын Гадаад хэргийн сайд Сергей Лавров байлдааны ажиллагааг түр зогсоох саналыг няцааж, барууны орнууд Украиныг дахин зэвсэглэхийн тулд түр завсарлага авахыг зорьж байна хэмээн буруутгасан байна. Мөн АНУ-ын Төрийн нарийн бичгийн дарга Марко Рубио, С.Лавров нар уулзах үеэр үр тарианы тээвэр болон эрчим хүчний дэд бүтцэд халдахыг харилцан зогсоох боломжийн талаар санал солилцсон боловч ОХУ-ын албан мэдэгдэлд энэ талаар дурдаагүй байна.
Эх сурвалж:
•
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.