С.Молор-Эрдэнийг үргэлжлүүлэн цагдан хорихоор шийдвэрлэжээ

Дүүргийн Эрүү, Иргэний хэргийн хялбар ажиллагааны анхан шатны тойргийн шүүхээс философич С.Молор-Эрдэнийн өмгөөлөгчийн гаргасан таслан сэргийлэх арга хэмжээг өөрчлөх хүсэлтийг хянаад, түүнийг үргэлжлүүлэн хорих шийдвэр гаргажээ. Шүүх хуралдаанаар өмгөөлөгчийн гаргасан хүсэлтийг хэрэгсэхгүй болгож шийдвэрлэснээр сэжигтнийг мөрдөн шалгах ажиллагааны явцад цагдан хорих хугацааг хэвээр үлдээсэн байна.

Тагнуулын ерөнхий газраас С.Молор-Эрдэнийг өнгөрсөн есдүгээр сарын 1-ний шөнийн 02:40 цагт хойшлуулшгүй ажиллагааны хүрээнд баривчилсан түүхтэй. Үүний дараа есдүгээр сарын 2-ны өдөр Нийслэлийн Прокурорын газраас ирүүлсэн саналыг шүүх хүлээн авч, Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3-т заасны дагуу түүнд 30 хоногийн хугацаатай цагдан хорих таслан сэргийлэх арга хэмжээ авсан юм.

Мөрдөн шалгах байгууллагаас түүнийг Эрүүгийн хуулийн 19.9 дүгээр зүйлд заасан үндэсний эв нэгдлийг бусниулах гэмт хэрэгт холбогдуулан шалгаж байна. Тэрбээр нийтийн цахим сүлжээ болон подкастуудаар дамжуулан төрийн тусгаар тогтнол, үндэсний аюулгүй байдал, өв уламжлал, түүхийг илтэд гутаан гуйвуулсан, тэр дундаа Чингис хаан болон ард түмний талаар маргаан дагуулсан байр суурь илэрхийлсэн хэмээн буруутгагдаж байгаа аж.

Хэрэгтэй холбогдуулан өмгөөлөгч Б.Энх-Амгалан, С.Ганхуяг нар анхны 30 хоногийн цагдан хорих захирамжийг эсэргүүцэн шүүхийн Ерөнхий шүүгчид гомдол гаргаж байв. Гэвч ерөнхий шүүгч есдүгээр сарын 8-ны өдөр өмгөөлөгчдийн гомдлыг хянан хэлэлцээд, анхан шатны шүүгчийн захирамжийг хууль ёсны үндэслэлтэй гэж дүгнэн хэвээр үлдээж байсан удаатай.

Шүүхийн хамгийн сүүлийн шийдвэрээр өмгөөлөгчийн хүсэлт дахин няцаагдсан тул хуулийн байгууллагаас холбогдох ажиллагааг үргэлжлүүлэн явуулж байна.