Дэлхийн түүхэнд тэмдэглэгдсэн хамгийн урт болон удаан замын түгжрэлүүд

Дэлхийн авто замын түүхэнд хэдэн өдрөөр үргэлжилсэн, олон сая тээврийн хэрэгслийг хамарсан томоохон замын түгжрэлүүд гарч, олон улсын анхаарлыг татаж байв. Байгалийн үзэгдэл, нийгэм улс төрийн томоохон үйл явдал болон дэд бүтцийн засварын ажлуудаас шалтгаалан зуу гаруй километр үргэлжилсэн цуваанууд дэлхийн томоохон гүрнүүдийн хурдны замуудыг бүрэн зогсоож байсан түүхэн тохиолдлууд бий.

БНХАУ-ын Үндэсний 110 дугаар зам буюу Бээжин–Төвдийн чиглэлийн хурдны замд 2010 оны наймдугаар сард гарсан түгжрэл нь дэлхийн түүхэн дэх хамгийн удаан үргэлжилсэн гацалтын нэгээр бүртгэгдсэн юм. Нийт 12 өдрийн турш 100 гаруй километр зайд үргэлжилсэн энэхүү түгжрэлд 10,000 гаруй тээврийн хэрэгсэл саатжээ. Бээжин хот руу чиглэсэн нүүрс тээврийн хүнд даацын автомашинуудын их урсгал болон зам засварын ажил давхацсанаас үүдэн жолооч нар өдөрт дунджаар ердөө нэг километр урагшилж, зарим нь зам дээр тав хоносон байна.

Европ тивд хамгийн урт үргэлжилсэн цуваа 1980 оны хоёрдугаар сарын 16-нд Франц улсын Лион–Парис чиглэлийн замд үүсэж байжээ. Өвлийн амралтаа дуусгаад нийслэл рүүгээ буцаж байсан аялагчдын урсгал цаг агаарын таагүй нөхцөлтэй давхацсанаар 175-176 километр урт цуваа үүсгэж, Гиннесийн дэлхийн дээд амжилтын номонд тэмдэглэгдсэн байна.

Түүнчлэн 1990 оны дөрөвдүгээр сард Берлиний хана нурсны дараах анхны Улаан өндөгний баяраар Зүүн ба Баруун Германы хил дээр ойролцоогоор 18 сая автомашин нэгэн зэрэг хөдөлгөөнд оролцож, олон арван километр сунасан асар том дараалал бий болгож байв.

Байгалийн гамшигт үзэгдлээс үүдэлтэй замын түгжрэлийн тод жишээ нь 2005 оны есдүгээр сард АНУ-ын Техас мужийн Хьюстон хотод тохиолдсон явдал юм. "Рита" хар салхины аюулаас сэрэмжилж хотоос нүүлгэн шилжүүлэлт хийсэн 2.5 сая иргэний автомашинууд хурдны зам дээр 160 гаруй километр урт цуваа үүсгэн, хөдөлгөөн 48 цаг гаруй хугацаанд бүрэн саатжээ.