Гэрийн үйлчлэгч нараа 20 жилийн турш хүчирхийлсэн саятанд холбогдох хэрэг шүүхэд шилжжээ
Их Британийн 65 настай саятан Кевин Бутыг Шотландын хойд хэсэгт орших алслагдсан эдлэндээ эмэгтэйчүүдийг 20 жилийн турш боолчилж, нууц бункерт тамлан хүчирхийлсэн хэрэгт буруутган, 21 зүйл ангиар шүүн таслах ажиллагааг үргэлжлүүлж байна.
Хурдан морины уралдааны бооцооны таамгаар хөлжсөн хуучин математикийн багш тэрбээр 1998 оноос 2022 оны хооронд гадаад, дотоодын олон эмэгтэйг гэрийн үйлчлэгч нэрээр хууран мэхэлж, нийгмээс бүрэн тусгаарлан хүчирхийлж байсан нь мөрдөн шалгалтаар тогтоогджээ.
Хэрэг явдал Кейтнесс гүнлэгийн Олтнабрек тосгон дахь хувийн эзэмшлийн бөглүү эдлэнд гарсан бөгөөд олон километр үргэлжлэх хувийн замаар явж хүрдэг уг байршилд нийтийн тээвэр хүрэх ямар ч боломжгүй газар юм байна. Байшингийн шалан доор байрлах тусгай нүхээр доош буухад 60 метр урт бетонон хонгил бүхий газар доорх нууц бункер угтах аж. Бут уг нууц өрөөнд хүний биеийн өндөртэй ижил Египетийн баримлууд, хоосон авс болон төмөр вандан сандал байрлуулж, дотор нь тусгай камер суурилуулсан байсан нь илэрсэн юм. Тэрээр Европын орнууд, Өмнөд Африк, Филиппин, Шри-Ланка зэрэг улсаас ирсэн эмэгтэйчүүдэд хатуу шийтгэл оноох нөхцөлтэй гэрээ тулган гарын үсэг зуруулж, ташуур, модоор зодон тамлаж, бэлгийн хүчирхийлэл үйлдэхдээ зарим үйлдлээ дүрс бичлэгт хураан авдаг байжээ.
Гэмт этгээдийг олон жилийн турш хариуцлагаас мултрахад Шотландын эрүүгийн эрх зүйн тогтолцооны онцлог болон хохирогчдын эмзэг байдал нөлөөлсөн байна. Учир нь тус улсын хуульд ганц хохирогчийн мэдүүлгээр ял оноох боломжгүй бөгөөд заавал хөндлөнгийн баримт, эсвэл өөр гэрчийн мэдүүлгээр батлах хатуу журам үйлчилдэг.
Тухайлбал, 2019 онд нэгэн үйлчлэгч цагдаад хандсан боловч нотлох баримт хангалтгүй гэх шалтгаанаар хэргийг хоёр жилийн дараа хааж байжээ. Түүнчлэн гадаадын иргэн хохирогчид айдас, дарамтаас үүдэн Их Британиас даруй дүрвэж байсан нь мөрдлөг сунжрах шалтгаан болсон төдийгүй гэмт этгээд үйлдлээ харилцан тохиролцсон хөдөлмөрийн харилцаа байсан хэмээн мэтгэж байв.
Эрүүгийн хэргээр шууд шийтгэхэд саад тулгарсан тул Шотландын цагдаагийн газар Хүн худалдаалахтай тэмцэх тухай хуулийг ашиглан иргэний шүүхэд хандсан юм. Үүний үр дүнд 2025 оны хоёрдугаар сард Кевин Бутыг гадаадаас шинэ хохирогч элсүүлэхээс сэргийлж, Их Британийн түүхэнд анх удаа дэлхийн аль ч улс руу зорчихыг хориглосон хилийн хориг тогтоожээ. Улмаар 2025 оны арванхоёрдугаар сард Уик хотын Шерифын шүүх түүнийг гэрийн үйлчлэгчээ бэлгийн халдлагад өртүүлсэн нэг тохиолдолд гэм буруутайд тооцож, бэлгийн гэмт хэрэгтнүүдийн бүртгэлд оруулан, хоёр жилийн хяналт болон хохирлын нөхөн төлбөр оноосон байна.
Одоогийн байдлаар Кевин Бутад хүчингийн найман удаагийн тохиолдол, хүний хулгай, зодоон, хүүхдийн эсрэг харгис харьцаа зэрэг нийт 21 эрүүгийн хэрэг үүсгээд байна. Шүүхээс 2026 оны есдүгээр сард түүний гадаад улс руу гарах хоригийг цуцлуулах тухай давж заалдах гомдлыг бүрэн хэрэгсэхгүй болгожээ. Олон жилийн турш сунжирсан энэхүү хүнд ноцтой гэмт үйлдлүүдийг шүүн хэлэлцэх бэлтгэл ажил үргэлжилж байгаа бөгөөд гэм буруутанд хатуу ял оноох эрх зүйн үйл явц дараагийн шатандаа орж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.