Шведийн хулгайд алдагдсан хурдны камеруудыг Оросын нисгэгчгүй онгоцнуудаас олжээ

Швед улсад сүүлийн саруудад 100 гаруй хурдны камер хулгайд алдагдсан бөгөөд эдгээртэй ижил төрлийн камеруудыг Украин дахь Оросын дрон буюу нисгэгчгүй онгоцнуудаас олж илрүүлснийг орон нутгийн хэвлэлүүд мэдээлжээ.

Өнгөрөгч пүрэв гарагт л гэхэд Хофорс, Фалун хотуудын хоорондох Е16 хурдны замаас дор хаяж гурван камер алга болсон гэж өдөр тутмын "Aftonbladet" сонинд бичсэн байна. Шведийн Тээврийн албанаас мэдээлснээр, зам дагуу байршуулсан хурд хэмжигч төхөөрөмжүүдээс гэмт этгээдүүд зөвхөн камерыг нь л хулгайлсан бөгөөд радар зэрэг бусад электрон төхөөрөмжийг хөндөөгүй байжээ. Эдгээр камерын нэгийг нь солиход 250 мянган крон буюу 22 мянга гаруй ам.доллар зарцуулах шаардлагатай тул энэхүү зохион байгууллагатай хулгай нь тус улсын замын хяналтын системд ихээхэн хохирол учруулсныг албаныхан тэмдэглэсэн юм.

Ukrainian soldier dismantled the Russian Orlan drone, debunking the Russian drone myth. pic.twitter.com/exFbA0y5Eu

— Caesar (@Ninja998998) April 11, 2022

Тодруулбал, Шведийн хурдны камерууд нь "Cannon" брэндийн DSLR төрлийнх нь бөгөөд Оросын армийн "гар хийцийн" дронуудад адил камер суурилуулсан байсныг Украины зэвсэгт хүчний дэлгэсэн бичлэгээс олж тогтоосон байна.

Шведийн Аюулгүй байдлын алба хулгайд алдагдсан хурдны камерууд болон Оросын дронуудын тоног төхөөрөмж хоорондын болзошгүй холбоог мэдэж байгаа ч "Тагнуулын ажлынхаа талаар дэлгэрэнгүй мэдээлэл өгөх боломжгүй" гэж сэтгүүлчдэд тайлбарлажээ.

Эх сурвалж: RT