Хан-Уул дүүргийн 18-р хороонд баригдаж байгаа байгууламж дээр ажиллаж байсан сунадаг автокран унасантай холбоотой асуудлаар өнөөдөр МХЕГ-аас мэдээлэл өглөө.

МХЕГ-ын дэд бүтцийн хяналтын газрын дарга Д.Мягмар:

- Мэргэжлийн хяналтын байгууллагын төлөвлөгөөт хяналт шалгалт сүүлийн хоёр жил зогссон. Гэсэн ч өнгөрсөн хоёрдугаар сард Мэргэжлийн хяналтын байгууллага барилгын ажил эхэлж байгаатай холбоотойгоор урьдчилан сэргийлэх арга хэмжээг зохион байгуулж, ААН-д албан шаардлага хүргүүлсэн.

Улмаар дөрөвдүгээр сарын 10-наас зургаадугаар 10-ны хооронд барилгын ажил явагдаж байгаа газруудад болон ашиглагдаж байгаа ч эрсдэл өндөртэй барилгуудад улсын ерөнхий байцаагчийн удирдамжийн хүрээнд шалгалт хийлээ. Уг шалгалтад нийт 2,100 гаруй барилга байгууламж хамрагдсан.Үүний 10 гаруй хувь нь газрын захирамж гаргуулаад архитектур төлөвлөлтийн даалгавар аваад ямар нэг зөвшөөрөлгүйгээр барилгын ажил эхлүүлсэн зөрчил гарлаа.

Улаанбаатар хотод нийт 54 барилга ийм асуудалтай байна. 78 барилга тодорхой холбогдох шийдвэргүйгээр барилгын ажил эхэлсэн нь тогтоогдсон. Тухайн барилгуудтай холбоотойгоор эрх бүхий албан тушаалтны тогтоол шийдвэр гаргуулах, зөрчлийн хэрэг нээж, үйл ажиллагааг зогсоох зэрэг арга хэмжээг хугацаанд авсан.Мөн шалгалтад хамрагдсан барилгуудад хөдөлмөрийн аюулгүй байдал, техникийн аюулгүй байдлын чиглэлээр ч асуудал үүссэн.

Одоогийн байдлаар Монгол Улсад нийт 17 мянган өргөх байгууламж бүртгэлтэй байдгаас 14 мянга нь идэвхтэй үйл ажиллагаа явуулдаг байна.БХБЯ 100 аж ахуй нэгж магадлан батламжлал өгдөг байна. Харин өргөх өргүүр буюу кран 3000 орчим бүртгэлтэйгээс 360 орчим нь автокран байна.

МХЕГ-ын Хөдөлмөр, нийгмийн хамгааллын хяналтын газрын дарга Б.Батзориг:

-Өчигдрийн кран унаж, хоёр хүний амь эрсэдсэн барилгад Мэргэжлийн хяналтын байгууллагаас өнгөрсөн хавраас эхлэн зөвлөмж хүргүүлж байсан. Хөдөлмөрийн хяналтын улсын байцаагч нарын зүгээс аюулгүй ажиллагааг ханган ажиллаж байна.

Хоёр сарын хугацаанд хийсэн шалгалтын хүрээнд Хан-Уул дүүргийн улсын байцаагч зургаадугаар сарын 07-нд тус барилга дээр очиж, урьдчилан сэргийлэх хяналт шалгалт хийж, улсын байцаагчийн мэдэгдэх хуудас хүргүүлсэн. Тухайлбал, мэдэгдэх хуудсын 11-р зүйлд заасны дагуу кран хариуцагчаар мэргэжлийн хүн томилж ажиллуулах зөвлөмж өгч байсан. Мөн гүйцэтгэх компанийн ХАБ, удирдах ажилтнуудад заавар зөвлөмж өгч ажилласан.

МХЕГ-ын Барилгын техникийн хяналтын улсын ахлах байцаагч Г.Эрдэнэхүү: 

- Хан-Уул дүүргийн 18-р хороонд барьж буй, "Номин Реалтор"-ын захиалга өгсөн барилгын талбайд гурван өргөгч төхөөрөмж байрлаж ажиллаж байсан.

БНХАУ-д үйлдвэрлэсэн. Хоёр авто, нэг цамхагт кран байсан. Цамхагт кран тухайн үед ажиллаагүй. Осол гаргасан авто кран 50 тоннын даацтай. Тухайн хашаанд өөр авто кран ажиллаж байсан. Ослын үед хоёр хүн нас барж, нэг хүн өндрөөс унаж бэртсэн.

Барилгын компани кран ашиглахдаа зориулалтын зам талбайг засаж, тэгшилж ашиглах ёстой байдаг. Гэтэл тус компани дүрмийн дагуу бэлдээгүй, тэгш бус гадаргуу дээр кран тавьж ажиллуулнаас болж кран унасан байх магадлалтай гэж урьдчилан дүгнэж байна. Тэр кран хувь хүний эзэмшлийнх бөгөөд тус барилга дээр ажил гүйцэтгэх гэрээ байгуулж ажиллуулж байсан.

Эцсийн байдлаар гэм буруутныг цагдаагийн байгууллага тогтооно. Мэргэжлийн хяналтын газраас өөрийн чиг үүргийнхээ хүрээнд мэдээлэл өгөх боломжтой гэлээ.

 

---