УОК-ын дарга С.Амарсанаа ICT экспог зохион байгуулах зөвшөөрлийг ХХМТГ-ын дарга Б.Болор-Эрдэнэд олгожээ

Засгийн газрын тохируулагч агентлаг болох Харилцаа холбоо, мэдээллийн технологийн газраас ICT экспог "Digital nation" уриан дор есдүгээр сарын 17-19-нд зохион байгуулж байна. Харилцаа холбоо, мэдээллийн технологийн газрын дарга Б.Болор-Эрдэнийн зохион байгуулж буй тус арга хэмжээний нээлтэд Ерөнхий сайд Л.Оюун-Эрдэнэ болон Засгийн газрын гишүүд оролцсон юм.

Үндэсний соёл амралтын хүрээлэнд болж буй тус арга хэмжээний нээлт өчигдөр хөл хөдөлгөөн ихтэй болж, цар тахлын үед иргэдийг олноор нь цуглуулсан гэх шүүмжлэлийг дагуулаад буй. Тэгвэл тус арга хэмжээг НОК-оос зөвшөөрөөгүй байтал УОК-ын дарга С.Амарсанаа Харилцаа холбоо, мэдээллийн технологийн газрын дарга Б.Болор-Эрдэнэд уг арга хэмжээг зохион байгуулахыг зөвшөөрсөн байна.  

Харилцаа холбоо, мэдээлэл технологийн газрын дарга Б.Болор-Эрдэнэ НОК-ийн шийдвэрийг үл тоон тус арга хэмжээг зохион байгуулсан нь олны дургүйцлыг хүргээд байгаа юм.

НОК-оос энэ сарын 1-ний өдөр Харилцаа холбоо мэдээллийн технологийн газарт хүргүүлсэн албан бичигт "Цахим үндэстэн-Digital Nation 21" арга хэмжээ зохион байгуулах зөвшөөрөл олгох боломжгүйг мэдэгджээ.

Гамшгаас хамгаалах өндөржүүлсэн бэлэн байдалд ажиллаж байгаа, мөн сургууль, цэцэрлэгийн сургалтыг эхлүүлсэнтэй холбоотойгоор халдварын тархалт нэмэгдэх өндөр эрсдэлтэй хэмээн үзэж төрийн болон ААН, иргэний аливаа арга хэмжээ зохион байгуулах хүсэлтийг хүлээн авахгүй байгаагаа НОК-оос албан бичгээр мэдэгдсэн байна.

Тэгвэл УОК-ын дарга С.Амарсайхан Харилцаа холбоо мэдээллийн технологийн газарт хүргүүлсэн албан бичигт "Цахим үндэстэн-Digital Nation 21" арга хэмжээ зохион байгуулах ажлыг дэмжиж буйгаа илэрхийлсэн байна. Албан бичигт халдвар хамгааллын дэглэмийг чанд сахиулахыг анхааруулсан байна.

Нийслэлийн Гамшгаас хамгаалах өндөржүүлсэн бэлэн байдал нь НОК-т хамааралтай болохоос биш УОК-т хамааралгүй байтал УОК-ын дарга С.Амарсанаа юуны учир зөвшөөрөл олгосон нь хачирхалтай.

Б.Болор-Эрдэнийн хувьд Ерөнхий сайд Л.Оюун-Эрдэнийн томилгоогоор уг албан тушаалд очсон. Харилцаа холбоо, мэдээллийн технологийн газрын дарга болсноосоо хойш Монголын 300 гаруй мэдээллийн сайтад мониторинг хийлгэж, мэдээ нийтлэлийг нь шүүлгэсэн байдаг. Ингэхдээ төсвийн мөнгөөр зөвхөн өөрийнхөө нэр орсон мэдээллийг шүүлгэсэн гэгддэг.