Европын Холбооны Эмийн Агентлаг "Pfizer Inc" болон "BioNTech" компаниудын хамтран боловсруулсан коронавирусийн эсрэг вакциныг 12-15 насны хүүхдүүдэд тарих зөвшөөрлийн хүсэлтийг үнэлж эхэлсэн талаараа мэдээлжээ.

Тус агентлагийн Хүний хэрэглээний ​​эмийн хороо нь хоёр компанийн зүгээс ирүүлсэн мэдээллийн хурдавчилсан үнэлгээг хийх бөгөөд ирэх 6 дугаар сард шийдвэрт хүрэх төлөвтэй байгаа аж. АНУ-ын "Pfizer Inc" болон ХБНГУ-ын "BioNTech" компаниуд нь 2,000 гаруй өсвөр насныхны дунд судалгаа явуулсан бөгөөд тэдний вакцин нь аюулгүй ба үр дүнтэй гэж тогтоосон хэмээн мэдээлжээ. Клиник судалгаанд оролцсон хүүхдүүдийг цаашид хоёр жилийн турш ажиглан, вакцины аюулгүй байдлыг хянах гэнэ.

"Pfizer" вакциныг одоогоор 16 ба түүнээс дээш насны хүмүүст хэрэглэхийг зөвшөөрөөд байгаа билээ. Энэхүү зөвшөөрлийг өргөжүүлэн, 12-15 насны бүлгийг хамруулснаар Европын насанд хүрээгүй, эрсдэл багатай хүн амд цар тахлын эсрэг вакцин тарих боломж нээгдэх юм.

Дэлхийн улс орнуудад батлагдсан коронавирусийн эсрэг вакцины ихэнх нь зөвхөн насанд хүрэгсдэд зориулагдсан билээ. Хэдийгээр насанд хүрсэн иргэд нь өндөр эрсдэлтэй хүмүүс ч бүх насны хүүхдүүдийг вакцинжуулах нь цар тахлыг зогсооход чухал үүрэг гүйцэтгэнэ гэж эрүүл мэндийн мэргэжилтнүүд үзэж байгаа юм.

Эх сурвалж: Associated Press

---