Цар тахлын улмаас ядарч туйлдсан Австрийн Эрүүл мэндийн сайд огцорчээ
Коронавирусийн цар тахлын эсрэг тэмцлийн улмаас ядарч туйлдан, бие нь өвдсөн Австрийн Эрүүл мэндийн сайд Рудольф Аншобер огцрохоор шийджээ.
60 настай Аншобер цусны даралттай холбоотой асуудлын улмаас хоёр удаа ажлаасаа чөлөө аваад байсан билээ. Тэрээр өнгөрөгч мягмар гарагт мэдэгдэл хийхдээ "Би өөрийгөө сүйтгэхийг хүсэхгүй байна. Австри улс сүүлийн хэдэн арван жилд тохиолдоогүй эрүүл мэндийн хямралд ороод байгаа үед бидэнд 100 хувь эрүүл чийрэг Эрүүл мэндийн сайд хэрэгтэй. Тэр нь одоогоор би биш" гэжээ.
Сэтгүүлч, багш мэргэжилтэй Аншобер нь Австрийн хамгийн алдартай улс төрчдийн нэг бөгөөд цар тахлын тулгамдсан асуудлуудыг удаан, тэвчээртэйгээр тайлбарладгаараа олон нийтэд танигдсан байна. Тэрээр мөн тус улсын хорио цээрийн арга хэмжээг чангатгахыг шаардсан Засгийн газрын цорын ганц дуу хоолой байсан аж. Үүний улмаас тэрээр канцлер Себастиан Курцын консерватив үзэлтнүүдтэй байнга мөргөлддөг байжээ.
Аншобер ажлын өндөр ачааллын улмаас сүүлийн жил гаруйн хугацаанд ганц ч өдөр бүтэн амраагүй бөгөөд энэ нь түүний эрүүл мэндэд хохирол учруулсан болохыг тэмдэглэжээ. Тэрээр "Би 15 сарын өмнө маш сайхан хэдий ч өндөр хариуцлагатай ажилд орсон. Гэвч эдгээр 15 сар 15 жил шиг санагдлаа" хэмээн ярьжээ.
Австрийн шинэ Эрүүл мэндийн сайдаар анагаах ухааны эмч Вольфганг Мюкштейн сонгогдсон бөгөөд ирэх даваа гарагт тангараг өргөхөөр болжээ.
Эх сурвалж: Reuters
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.