ВИДЕО: "D&G" Шанхай дахь загварын шоугаа цуцалжээ
Италийн алдарт брэнд "D&G" өчигдөр орой Шанхай хотод хийх байсан загварын шоугаа цуцалсан талаар хэвлэлүүд бичжээ. Тус брэндийн сүүлд явуулсан сурталчилгааг арьс өнгөөр ялгаварлан гадуурхах үзлийг дэмжсэн гэж эсэргүүцсэн байна.
Мөн брэндийг үүсгэн байгуулагчдын нэг Стефано Габбана загвар өмсөгч Микайла Трановатай Инстаграммын зурвасаар харьцахдаа Хятадын талаар зүй зохисгүй үг хэрэглэж, “Хятадгүйгээр илүү сайхан амьдарна” гэж бичсэн зураг олон нийтийн цахим сүлжээнд тархжээ.
Хятад бүсгүй Итали пицца, пастаг савхаар идэж эротик дүр гаргасан сурталчилгаа болон Инстаграммын зурвасаас болж weibo сүлжээнд “D&G-г эсэргүүцье” хаш таг цахим жагсаал газар авчээ. Хятадын эрх баригчид дэлхийн алдартай брэндүүдийн нэгийг дээрх шалтгааны улмаас загварын шоугаа зохион байгуулах эрхгүй гэж үзэж цуцалсан байна.
Олон арван сая ам.доллар зарцуулсан байсан загварын шоуг цуцалсны дараа Стефано Габбана өөрийн Инстаграмм хаягийг хакердуулсан байсан гэж мэдэгджээ. Мөн “D&G Хятадад хайртай” гэсэн хаш таг эхлүүлж хүлцэл өчсөн пост нийтэлсэн байна.
Хятадын алдартнууд өчигдрийн шоунд уригдсан байсан ч зүй бус зурвас олон нийтийн сүлжээнд тархсны дараа арга хэмжээнд оролцохоос татгалзаж байгаагаа илэрхийлээд байжээ. Жүжигчин Ли Бинбин өөрийн 42 сая дагагчтай weibo хуудсаар “Би эх орондоо хайртай” гэж постолсон бол “TFBoys” хөвгүүдийн хамтлагийн дуучин Ван Жункай “Миний эх орон юунаас ч илүү чухал” гэж үзэл бодлоо илэрхийлжээ.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.