Францын сүүлчийн хатан Марие Антонеттын үнэт эдлэлийг дуудлагаар худалдана
Францын эзэн хаан 16 дугаар Луистай гэр бүл болсон Австрийн гүнж Марие Антонеттын эдэлж хэрэглэж байсан сувдан зүүлт, ээмэг, бөгж болон үсний хатгуурыг дуудлагаар худалдах гэж байна.
Швейцарийн Женев хотод өнөөдөр болох дуудлага худалдаан дээр хатан хаан Антонеттын үнэт эдлэлийг 2 сая ам.доллараас эхлэн үнэ дуудах юм байна.
Францын сүүлчийн хатан хувьсгалын үеэр цаазлуулахаасаа өмнө үнэт эдлэлээ эх орон руугаа хулгайгаар илгээсэн байжээ. Хатан хаан хүүхдүүдээ дагуулан 16 дугаар Луис хааны хамт оргож зугтахыг оролдсон ч харамсалтай нь чадаагүй юм. Антонетт 1793 онд 37 насандаа цаазлуулсан. Түүний хайнга гэмээр хүүхэд зан ямбатнуудын дургүйцлыг хүргэдэг байжээ.
Эмгэнэлт түүхийн гэрч болсон хатан хааны сувдан ээмэг зүүлтийг 200 гаруй жилийн турш олон нийтийн нүднээс далд хадгалсан аж. Эдгээр үнэт эдлэлийг урласан сувд, очир эрдэнэ бүгд байгалийн үнэт олдворууд гэж Сотебайс дуудлага худалдааны мэргэжилтнүүд онцолсон.
Өнөөдөр болох дуудлага худалдаан дээр хатан хаан Антонеттын үнэт эдлэлүүдээс гадна Францын хаан 10 дугаар Чарльзын очир эрдэнээр урласан 550 мянган ам.долларын үнэтэй титмийг худалдах юм байна.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.