Өчигдөр хуралдсан МАН-ын удирдах зөвлөлийн хурлаар Нийслэлийн засаг дарга бөгөөд Улаанбаатар хотын захирагч С.Батболдыг огцруулах санал гарч, улмаар албан тоот үйлдэн НИТХ-ын дарга С.Амарсайханд илгээсэн билээ.

 

Уг албан бичигт Засгийн газрын 2016-2020 оны үйл ажиллагааны мөрийн хөтөлбөрийг хэрэгжүүлэх, нийслэлийн иргэдийн өмнө тулгамдсан асуудлыг шийдвэрлэх хүрээнд хуулиар хүлээсэн чиг үүргээ хэрэгжүүлж чадаагүй гэж үзэж, Монгол улсын засаг захиргаа, нутаг дэвсгэрийн нэгж, түүний удирдлагын тухай хуулийн 32,3-т заасан “Засаг дарга чиг үүргээ хэрэгжүүлж чадаагүй” гэсэн үндэслэлээр түүнийг огцруулах саналыг хүргүүлж байна гэжээ.

Хуулинд зааснаар бол: Хотын даргыг гэмт хэрэг үйлдсэн нь шүүхийн хүчин төгөлдөр шийтгэх тогтоолоор нотлогдсон, түүнчлэн хууль тогтоомж зөрчсөн буюу чиг үүргээ хэрэгжүүлж чадаагүй бол тухайн шатны Хурал түүнийг бүрэн эрхийнх нь хугацаа дуусахаас өмнө огцруулах саналыг хүргүүлдэг. Түүнийг нь НИТХ 15 хоногийн дотор хэлэлцэж санал хураалт явуулж хариу өгөх заалттай.

Өөрөөр хэлбэл Засгийн газрын тэргүүн Хотын даргыг батламжлах бүрэн эрхтэй ч шууд огцруулах эрхгүй. Харин саналаа түүний эрх үүргийг батламжилсан НИТХ-д уламжлах эрхтэй аж.

Өчигдөр буюу 2018 оны 11 дүгээр сарын 12-ны өдөр Ерөнхий сайд саналаа НИТХ-д уламжилсан. Үүнээс хойш 15 хоногт багтаан НИТХ засгийн газрын тэргүүний уг саналыг хэлэлцэн шийдвэрээ гаргах учиртай.

НИТХ энэ сарын 29-нд нийслэлийн 2019 оны төсвийг хэлэлцэхээр тов зарласан. Ерөнхий сайдын санал НИТХ-ын энэ хуралтай цаг хугацааны хувьд давхцаж байгаа учраас уг хурлаар асуудлыг нэг мөр авч хэлэлцэхээр болжээ.

Дашрамд дурдахад хуулиараа хотын дарга мөрийн хөтөлбөрийн хэрэгжилт болон ирэх оны үндсэн чиглэлээ НИТХ-аар жилд 2 удаа хэлэлцүүлдэг байна. 2018 онд НИТХ 2 удаа хотын даргын мөрийн хөтөлбөрийг авч хэлэлцээд " Хангалттай " гэж дүгнэн 2019 оны хэрэгжүүлэх үндсэн чиглэлийг нь баталжээ.

 

---