Бүх цаг үеийн шилдэг хөлбөмбөгчдийн нэгээр тодорсон Португалийн алдарт тамирчин Кристиано Рональдог хүчирхийллийн гэмт хэрэгт буруутгаад байгаа. Гэвч алдарт хөлбөмбөгчин “ор үндэсгүй, худал мэдээлэл цацсан тул заргалдана” гэдгээ мэдэгдсэн.

Хэрэг явдлыг эргэн сөхвөл 34 настай Америкийн иргэн Кэтрин Майорга 2009 онд Лас Вегасын зочид буудалд Рональдод хүчирхийлүүлсэн гэжээ. Дараа нь Лас Вегасын цагдаагийн газарт хэргийг мэдүүлж бүртгүүлсэн байна. 2010 онд Португалийн хөлбөмбөгчин 375,000 доллар өгч болсон явдлын талаар олон нийтэд хэзээ ч мэдээлэхгүй байхаар тохирсон гэжээ.

Өөрийгөө хохирогч гэж нэрлээд байгаа эмэгтэйн хуульчид дээрх тохиролцоог хүчингүйд тооцож байгаа юм. Харин гэмт хэрэг үйлдээгүй гэж мэдэгдээд байгаа Рональдогийн өмгөөлөгчид энэ талаар анх мэдээлсэн Германы “Der Spiegel” сэтгүүлийг шүүхэд өгнө гэжээ. Тус сэтгүүл, эмэгтэй аль аль нь дэлхийн хамгийн алдартай хөлбөмбөгчнийг ашиглаж өөрсдийгөө сурталчилсан ба ёс суртахууны алдаа гаргасан хэмээн буруутгав. Үүгээр ч зогсохгүй хүний эрхийг ноцтой зөрчсөн гэж үзэж байна. Рональдо Реаль Мадрид клубтэй хийсэн гэрээгээ дуусгаж, Италийн Жувентуст тоглож байгаа.

Эх сурвалж: www.bbc.com

 

---