Холбооны мөрдөх товчооны бүх ажилтны нууц мэдээлэл хакеруудын гарт оржээ
АНУ-ын Холбооны мөрдөх товчоо өөрийн системд хакерууд нэвтэрч, нийт ажилтан болон ажлын байранд өргөдөл гаргагчдын хувийн нууц мэдээллийг хулгайлсан гэх хэргийг албан ёсоор шалгаж эхэллээ.
Кибер гэмт хэргийн "ShinyHunters" бүлэглэл уг халдлагыг үйлдсэнээ мэдэгдээд буй бөгөөд тус товчооны 37-38 мянган ажилтан болон FBIJobs.gov системээр дамжуулан ажилд орох хүсэлт гаргасан иргэдийн нийт 2-3 терабайт хэмжээтэй өгөгдлийг гартаа оруулсан гэж зарлажээ. Алдагдсан өгөгдөлд ажилтнуудын овог нэр, үнэмлэхийн дугаар, албан тушаал, гэрийн хаяг, утасны дугаар, гэр бүлийн гишүүдийн хувийн мэдээллээс гадна Хятадын болон Оросын тагнуулын алба, хар тамхины картелийн эсрэг сөрөг тагнуулын үйл ажиллагаа эрхэлдэг ажилтнуудын тусгай бүртгэл багтсан байна.
Уг халдлага нь санхүүгийн ашиг хонжоо олох зорилгогүй бөгөөд хакерууд Холбооны мөрдөх товчооны захирал Каш Пател болон Кибер гэмт хэрэгтэй тэмцэх албаны туслах захирал Бретт Литерман нарт хандан шаардлага тавьжээ. Тэд тус байгууллагаас тавдугаар сард нийтэлсэн, "ShinyHunters" бүлэглэлийг мэдээлэл хулгайлсан гэж худал мэдээлэл тарааж дарамталдаг сүрдүүлэгчид хэмээн тодорхойлсон албан ёсны анхааруулгыг цуцлахыг шаардаж, долоо хоногийн хугацаатай тулган шаардах бичиг илгээсэн байна.
Мөрдөн шалгах явцад системийн аль хэсгээр нэвтэрснийг нарийвчлан тогтоогоогүй байгаа бөгөөд шалгалтын багийнхан FBIJobs.gov порталыг хариуцдаг гуравдагч гэрээт нийлүүлэгчийн системээр, эсвэл байгууллагын дотоод сүлжээгээр нэвтэрсэн эсэхийг магадлахаар ажиллаж байна. Халдлагын улмаас тус байгууллагын ажлын байрны албан ёсны цахим хуудсыг тодорхойгүй хугацаагаар хааж, ажилтнууддаа өөрсдийн хувийн мэдээллийн аюулгүй байдлыг хангах яаралтай арга хэмжээ авахыг анхааруулсан дотоод санамж бичиг хүргүүлжээ.
Холбооны мөрдөх товчооны зүгээс зөвшөөрөлгүй хандалт хийсэн явдлыг нухацтай шалгаж байгаа ч тусгай ажилтнуудын мэдээлэл олон нийтэд задарсан нь сөрөг тагнуулын үйл ажиллагаанд томоохон эрсдэл үүсгэж болзошгүй байна. Кибер аюулгүй байдлыг хангах, мэдээллийн эх үүсвэрийг хамгаалах чиглэлээр холбогдох албаныхан эрсдэлийг бууруулах шат дараатай арга хэмжээг үргэлжлүүлэн авч байна.
Эх сурвалж:
•
• pbs.org
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.