ОХУ даяар шатахууны жижиглэнгийн борлуулалтад дахин хязгаарлалт тогтоолоо
Оросын төрийн өмчит “Роснефть” компани болон бүс нутгийн эрх баригчид шатахуун түгээх станцуудад автобензин, дизель түлшний жижиглэнгийн борлуулалтад дахин тоон хязгаарлалт тогтоож эхэллээ. Газрын тос боловсруулах томоохон үйлдвэрүүд дроны халдлагад өртөж, нийлүүлэлтийн сүлжээнд үүссэн доголдлоос үүдэн иргэдийн дунд зохиомол эрэлт, дараалал үүсэхээс сэргийлэх үүднээс ийнхүү шатахуун олголтод лимит заасан байна.
Шинэ журмаар хотын доторх шатахуун түгээх станцуудад нэг автомашинд 30 литрээс илүүгүй бензин, зарим бүсэд АИ-95 шатахууныг 30 литр хүртэл олгож байна. Харин хурдны замын дагуух салбаруудад нэг тээврийн хэрэгсэлд дээд тал нь 50 литр олгох журам үйлчилж эхэлжээ. Дизель түлшний тухайд суудлын автомашинд 50–100 литр, харин ачааны тэрэгний түргэн цэнэглэгч хошуугаар 200 литр хүртэл олгохоор хязгаар тогтоосон байна. Түүнчлэн ихэнх бүс нутагт канистрт шатахуун авахыг бүрэн түр зогсоосон бол нийслэл Москва хотын зарим цэгт автомашины 50 литрийн лимит дээр нэмж 20 литрийн металл канистр цэнэглэхийг зөвшөөрсөн байна.
Эдийн засгийн хөгжлийн яамнаас “Роснефть” компани орон даяар хязгаарлалт тогтоож эхэлснийг зарласан бол ОХУ-ын Буриад улсын нийслэл Улаан-Үдэ хотын салбаруудад бензинийг 30 литр, дизелийг 50 литрээр хязгаарлажээ. Мөн Бүгд Найрамдах Карели улсын тэргүүн зохиомол хомстол үүсэхээс сэргийлж 30–50 литрийн хязгаарлалт хэрэгжиж буйг баталсан бөгөөд Москва, Ленинград, Новосибирск, Тула, Нижний Новгород, Пенза, Архангельск муж болон Красноярскийн хязгаарт уг зохицуулалт үйлчилж байна.
Өмнө нь хэрэгжиж байсан зарим хязгаарлалтыг цуцлаад байсан боловч гурав хүрэхгүй долоо хоногийн дараа дахин сэргээсэн нь газрын тос боловсруулах үйлдвэрүүд дараалсан цохилтод өртсөнтэй холбоотой юм.
Газрын тос боловсруулах салбарын дэд бүтцийн эвдрэл болон сэргээн засварлах ажлын явц нь дотоодын зах зээлийн тогтвортой байдалд голлох нөлөө үзүүлэхээр байна. Иймээс эрх баригчид зохиомол хомстол, хэт эрэлт үүсгэхгүй байх, нөөцийн жигд хуваарилалтыг хангах зорилгоор жижиглэн борлуулалтын хяналтыг цаашид ч үргэлжлүүлэн чангатгаж болзошгүй байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.